RTK nuk trashëgon RTP

Në shtator të vitit 1999 RTK ka filluar transmetimin në bazë të Memorandumit të Mirëkuptimit midis OSBE-së dhe EBU-së, kurse në qershor të vitit 2001 Rregullorja e UNMIK-ut 2001/13 përcakton RTK-në si shërbim  transmetues të vetëm publik me një Bord jopolitik të Drejtorëve.

Prej muajit prill të vitit 2006 RTK si transmetues publik  i Kosovës funksionin në bazë të Ligjit për Radio Televizionin e Kosovës të miratuar nga Kuvendi i Kosovës.

Të gjitha këto dokumente juridikisht e kanë rregulluar dhe e rregullojnë statusin ligjor të RTK-së, si institucion të ri dhe si pjesë të rëndësishme e një realiteti të ri të krijuar në Kosovë pas 12 Qershorit 1999.

Së këndejmi, RTK-ja në bazë të ligjit, në asnjë segment nuk është trashëgimtare e ish - Radio Televizionit të Prishtinës, që ishte themeluar nga ish - Kuvendi i Krahinës Socialiste Autonome të Kosovës  në vitin 1974.

Rrjedhimisht, RTK-ja nuk ka bazë  ligjore për punësimin kolektiv të ish-punëtorëve të RTP-së.

Përkundër kësaj, në kuadër të politikave të veta të punësimit, në kushte të barabarta dhe në harmoni me nevojat e kompanisë, RTK-ja i ka dhënë dhe i jep përparësi punësimit individual të ish - punëtorëve të RTP-së, ose të afërmve të tyre.

Kjo politikë ka filluar zyrtarisht dhe sistematikisht të zbatohet që prej momentit të kosovarizimit të plotë të menaxhmentit të RTK-së dhe me inkurajimin dhe përkrahjen e vazhdueshme të Bordit te Drejtorëve të RTK-së.

Me qëllim të informimit të opinionit të gjerë, në vijim publikojmë listën e ish-punëtorëve të RTP-së, apo të afërmve të tyre që aktualisht punojnë në RTK.