YAVERINGA O JIVDIPE E ROMANI THAGARNI- ESMA REJEPOVA

Esma Rejepova Teodosievska adive ano yavinake orya yaveringya o jvidipe palo yekh pharo nasvalipe ano poro 73. bersh.

Esma Rejepova biyandili e 8-to Avgustea 1943 ano Skopye e Makedoniako. Kotar piri 6 jenutni familia oy sine duyto may bari e qhavorendar. Olako dat kerla sine buti ano ververutne profesie: sar golmano, gilavno, bateristi, buti ano cirko thay but aver. Ano poro 9'to bersh Esma Rejepova kotar yekh poro phral prezantisali ani yekh lokaluni organizacia e romana muzikaki, kote odothe siklili but sig o komplikime muzikake ritmya. Olaki day inkurainga olake muzikake todine kote akalea oy thay olako phral ule but sig kotor e folkloruna grupako e skolako. Oy sine yekh kotar o may penjarde makedoniake gilvne, kompozitorya, thay romani humanitaruni persona. Vash o sebepi e pere barvale repertoareske, kova kotorleinla shelenca gila, thay vash olako kontributi ani romani kultura thay olako promovipe, oy titulisali e kharipea ”Romani Thagarni”. Ano poro jivdipe oy performingya ano buderi se 9000 koncertya ano 30 thana, pere romeya Stevo Teodosievski kova may angle ulavdilo kotar o jivdipe. Ani olaki kariera ano panj palune dekade, oy ikalgya buderi se 60 muzikune albumya thay 500 arteske kotora thay 6 filmya. E Esma Rejepova pe 1975. sine ani India, ani rashtra Panjab, ani diz Qandigar, kote adikerdilo o Muzikako Festivali. Kotar e Indira Gandi ulavdili sar Thagarni e Romana muzikaki. Ani Moska 1996. b. lela e poqin Galbeno Laureati, yekh bersh angle, 1995.b. ano Frankfurt konfirmingyola Primadona e Gilaki, pale ani Moska 2000 b. ulavgyola Bershuni Juvli, numay vi duy ver sine kandidati e Nobeleska Poqinako vash o Traynipe. Ano Parizesko “Frans – soar”, o reporteri shunindoy e Esmaki gili ani “Olimpia”, hramingya: “Rakyuno shok – akaya sitoy e 16 bershuni romanica-e Esma Rejepova”. E Esma Rejepova sine ini humanista thay edukatora. Sar humanista mothavgyola e but humanitarune koncertyendar, numay ini 47 adoptime qhavorendar, kolen baryargya thay skoluingya. Oy kolaboringya e Lole Trushea. Mayphare divende olako kher e 450 m kvadratya ani Shutka sine sar yekh depo e habe-piyipeske artiklyenca, e yaver sheyenca, kola ulavdile sarenenge kola emigrinde ano Skopye: e Romenge, Albanyenge thay e yaverenge. E Esma Rejepova sitoy penjarni ini sar edukatori. Oy ano San Franciskako Univerziteti sinela kotar 100 studentya. E Esma Rejepova gilavdi romane gila, numay ini makedonyune thay turkyune gila. Olake gila na silen nacionalizmi. Esma Rejepova ani Makedonia alosardili sar nacionaluni gilavni ani 58-to edicia e evropake festivalesko vash e gili, ”Eurosong 2013”. Esma Rejepova Teodosievska yaveringa adive ano yavinake ore po jvidipe palo yekh pharo nasvalipe ano poro 73 bersh kote akava si te ovel yekh baro nashalipe ani angluni rig vash olaki familia, vash o Roma thay vi ayekha vash olake fansya thay olake kolege. Avdi M.