Phayripe ano vrdlorig e Mitrovicako

O sheruno undrimo vash o iratyuno phayripe ani upruni Mitrovica, kote khuvdile duy qhavore e familiako Vuqetiq, akana sito ano vasta e policiake. Ki yaver rig o Kosovako Raipe krisingya akava bilaqho ovipe ano vrdlorig e Kosovako.

O undrimo personi e inicialencar S.S. Kova sito e srbyune komunitetestar, sito khetano thanutno thay dengyola nota kay na sinele shukarne vakeripya e familiaha kay atakingya. Policiake rodlarne, ano realizipe e kontrolako, ano olesko kher identifikinde thay lele ververutne municie. O avazdenutno e policiako Besim Hoti phengya kay ano olesko kher arakhle yekh vasteski granata, duy karikatorya e automatikune bandukesko e 50 gloncyencar thay bandar yaver bandukya. Policia dengya oleske phanglipe kotar 48 orya, vash te lugyaren o avutne rodlaripeske procedure. Ko mashkar vahti, albanyune thanutne e “Boshnyakuna Mahalako” sine but darakerde palo akava phayripe. Direktori vash Garavipe thay Tromalipe, Behxhet Bala, vakergya kay beshte ani mahala rakyate feri so e dar e dizunengi sine bari. Ji kay o ayekhakhardo sheruno e upruna Mitrovicako Kërstimir Pantiq, palo akava ovipe rodingya kay o civiluno garavipe te therel bandukya sar vi duryaripe e KFOR-ko thay EULEX-ko kotar o Kosovako vrdlorig. Ji kay o Raipe e Kosovaka Republikako kharela e dizunen vash traynipe thay gojaveripe. Ayekha vi kerela kharipe vash ledeipe e dizunengo e rendoske organyencar thay o autorya akale ovipesko te iklon anglo hakaipe, vakergyola mashkar yaver ani yekh komunikata kotar o Kosovako Raipe.