YNTH-go nevo raporti vash e Kosova

Ano may nevo raporti vash e Kosova, savahtuno sekretari e Yekhune Themyenga Organizaciako, Ban Ki Mun dengya nota kay kerdilo o sheruno bajako ano dialogi mashkar e Kosova thay Srbia.

O savahtuno sekretari e Yekhune Themyengo Ban Ki Mun vakergya kay mashkar yaver kerdilo o sheruno bajako ano dialogi mashkar e Kosova thay Srbia, vazdindoy ole ano politikuno niveli, numay akava anglipe phiravdilo e incidentyencar, kola ule may but ano upruno kotor e Kosovako vakerindoy kay ulo but ver blokada e dromengi kotar o srbya sar sebepi e protestyengo vash o halovipe vash o samatredune thavdya, keripe e kherengo vash o albanya ani mitrovica thay problemya vash e sura e vizitengo e srbyune reprezentyengo ani Kosova. Vash e Mitrovica, o Ban Ki Mun hraminela kay manglape yekh khetane butyako ovipe thay o phare sure musay te alosargyon e shukarne resipyencar, ayekha kay te nashelpe kotar o neve tenziye. Mashkar yaver, ano raporti vakergyola kay o gendo e incidentyengo kana vakergyola mashkar o minoritetya ko nakhlo bersh tiknilo ano 361, ji kay ano bersh 2011 sine 406.