Edukipe e RAE qhavorengo ani komuna Ravuco

Phari socio ekonomikuni situacia e romane, ashkalyune thay egipqanyune komuniteteski ani komuna e Ravucoski, qalavela e qhavoren akale komunitetesko kay ma te lugyaren o mashkaruno skoluipe numay buderi olendar aqhavena vi olengo fundono skoluipe. Siguripe e materialuna bazako vash jivdipe, pandar aqhola te ovel ano sherunipe e listako akale manushengo. Silen yekh godinipe kay numay o buderuno komuniteti shay te laqharel olengi situacia, numay akava komuniteti kay na sito haricuno ano gendo, sil

Na kotorleipe e Romane, Ashkalyune thay Egipqanyune komunitetengo ano skoluipesko sistemi sine thay aqhola darakeripe vash o sherune akale komunitetengo numay vi vash o komunake sevalutne ano Ravuco. Akava komuniteti na dikhela o skoluipe sar prioriteti. Defrim Abazi, vakerla kay buderi qhavore akale komunitetengo nakhena ani skola ji pe 9-to klasa. Numay ani mashkaruni shkola shay te phengyol kay niyekh qhavoro na resela te nakhel… ”Fundono skoluipe lugyarena poro siklipe numay ano mashkaruno siklipe na si qhavore. May but sebepi siton o ekonomikune kondicie soske vash e mashakruni shkola musay te kingyon pustika thay yaver sheya. May but amare qhaya aqhavena o siklipe thay na silen yaver drom thay aqhola olenge kay te prandingyon”, vakerla mashkar yaver o raye Abazi. Enis Berisha direktori e fundona skolako Ardhmeria koya arakhlola ano than kote jivdinela akava komuniteti, vakerla kay olengi phari ekonomikuni situacia sila hasari kay olenge qhavore ma te ovelolen but suksesi ani skola ji kay na dikhlola ni yekh rig diskriminipeski ni kotar o qhavore ni kotar o sikavne. ”O skoluipe 70 pe shel mekhena numay si sure vi ko qhaya kola poro shkoluipe mekhena pandar bi agorime o fundono skoluipe. O sebepya na siton vash o socializipe thay yaver numay on mekhena e shkola vash o sebepi e angazhipyengo kay silen ano ververutne butya ini kay sar si pe krisya sito aqhavdo e qhavorenge te keren buti ano tiken bersha numay ovena o sure kote o qhavore nakhena te keren buti numay na simen problemya sar si diskriminipe vay socializipe”, phenela o direktori Berisha. Beqir Hajia, sevalutno vash qhavorenge hakaya thay sevalutno ano komunaluno ofisi vash komunitetya phenela kay gendo e jenengo kotar akala komunitetya kay kerna buti ani komunaluni administracia sito but tikno soske, sar phenla ov, si nanipe e skoluime kuadrengo. Akala silen may hari pokipya thay lena socialuno azhutipe, sah so sile o buderuno komuniteti silen vi on ano Ravuco, silen drom thay sah. Sito yekh tikno gendo kay lugyarena e mashkaruni shkola numay on silen mangipe kay te azhutingyon may but odola ano Ravuco kay lena socialuno azhutipe. Azhutingya olen vi e ministria, on vi lena kotor ano ververutne aktivitetya e birapkane organizaciengo, vakerla o sevalutno Hajia. Ani Ravucoski komuna jivdinela yekh konsiderimo gendo e dizunengo kotar o Romane, Ashkalyune thay Egipqanyune komunitetya, numay ano upruno kotor e dizyako jivdinena pashe 375 dizune, ji kay yekh baro gendo jivdinena ano Bari Krusha, Celina, Zerza, Ratkovc thay Kromovik. O qhavore akale komunitetengo siklona pe albanyuni qhib thay si vi odola kola siklona pe srbyuni qhib. On silen vi mangipe kotar o buderuno komuniteti thay ayekha kay ajukerna azhutipe kotar o buderuno komuniteti. Radio Kosova - Romtegra