Evropako Parlamenti miratingya vasni rezolucia vash o Roma

Evropako palramenti irati dosna miratingya e rezolucia kay o 2-to avgusti te ovel ofisialuno Dive vash pelaripe pe godi e genocidesko kay ulo pedral o Roma ano Duyto Lumiako Maripe.

O jene e parlamenteske kharde kay te kergyol may but buti ano aqhavipe e diskriminaciako, mudaripe thay koshipeske vakeripya mamuy o jene e romane komunitetesko ani Evropa. Ani rezolucia o jene e evropake Parlamentesko mothavde poro `hor darakripe vash bayripe e anticiganizmesko, kova mothavgyola, mashkar yaver, ini prekal e antiromengi retorika thay violence mamuy o Roma`. `Anti-ciganizmo na sito kompatibiluno e normencar thay molipyencar e Evropaka Uniako thay mothavela baro aqhavipe vash suksesuno integripe e Romengo`, vakergyola ani Rezolucia. Evropake parlamentarya kharde e Uniake themyen kay may efektivune te implementinen Direktiva vash rasyuno yekhipe vash o resipe e eliminipesko e diskriminaciako pedral o Roma, may but ano butyaripe, edukipe thay ano thanipesko akcesi`. Parlamenti ayekha vi akceptingya o historikuno fakti vash genocidi kay kerdilo pedral o Roma ano Duyto Lumiako maripe numay ini yaver forme e paldipesko sar si deportipe thay internipe, thay khargya e yaver themyen te akceptinen akava. Sar si pe rodlaripya, ano Duyto Lumiako maripe ano nesave thema o nacistikuno rezhimi mudargya buderi desar 80% e jenengo e romana populaciako. Redakcia `Romtegra` - Avdi M.