Agoringya e konferencia vash o Romane medie-EBU-RTK

Agorisali e duy divuni konferenca e tema Publikune Televizije vay transmetipya thay Romano komuniteti, akaya konferenca sitoy organizimi kotar Europaki Uniya thay Evropake transmiterengi unia ano ledeipe e Kosovaka Radio Televizia.

Ano duyto dive e konferenciako koya adikerdili pe 9 thay 10 Aprili o reprezentya e publikune mediengo kotar o ververutne thema ani Evropa mothavde olengi eksperienca thay than kay dena vash o romano komuniteti, ano medie kay on reprezentinena. Ini ko akava dive pandar yekh ver lepardilo kay e Kosovaki Radio Televizia sitoy yekhuno publikuno servisi kova transmetinela programi pe romani qhib sako dive, thay akava programi gatisargyola kotar o korkore zhurnalistya e romane komunitetesko. Kotar o rekomandipya kay dendile pe agor e konferenciako vakerdilo kay o romane zhurnalistya kerena maripe kay te oven pe yekhuni pozicia e sah yaver kolegencar ani sah lumia, feri so olengo avazo may shukar mothavela vash akava komuniteti. Ayekha vi vakerdilo kay o romane zhurnalistya na silen hako kay te kontrolinen poro imazhi ano medie, numay o yavera reprezentinena olen ani baza olenge mangipesko. Yaver rekomandipya kay dendile kotar o romane zhurnalistya sito kay te dengyol may but vahti vash o romane emisie ano publikune servisya, te formiringyon rafinya prekal kola o romane redaksie ka yaverinen materialya thay te adikergyon lunge vahtune treningya vash o romane zhurnalistya.