50 milionë euro për komunat veriore

50 milionë euro për komunat veriore

Katër komunat veriore të Kosovës, Mitrovica Veriore, Zveçani, Leposaviqi dhe Zubin Potoku, do t’i kenë të paktën 50 milionë euro për zhvillimin ekonomik të veriut të Kosovës. Këto mjete, siç kanë thënë në Agjencinë për Zhvillim Rajonal – Veri, janë parashikuar me Marrëveshjen e Brukselit, ndërkohë që ato mjete tashmë u janë ndarë këtyre komunave veriore të Kosovës.

Rreze Duli, drejtoreshë e Agjencisë për Zhvillimin Rajonal – Veri, ka precizuar se me Marrëveshjen e Brukselit janë paraparë 40 milionë euro mjete për zhvillimin e katër komunave veriore të Kosovës, si dhe 10 milionë euro të hyra nga doganat në pikat kufitare në Bërnjakë dhe në Jarinjë, të cilat derdhën në Fondi për Zhvillimin e Veriut në kuadër të Marrëveshjes për Kufijtë e Integruar, shkruan Zëri.

“Megjithatë, të dhënat statistikore tregojnë se veriu i Kosovës është rajoni më i varfër në vend”, është konstatuar në debatin që është mbajtur me temën ‘Zhvillimi ekonomik i veriut të Kosovës’, që është mbajtur në Çagllavicë.

Në këtë debat u vlerësua gjithashtu se afaristët janë të vetmit që i japin shtetit, ndërsa shteti atyre nuk ua kthen me asgjë.

“Me Marrëveshjen e Brukselit janë paraparë rreth 40 milionë euro për katër komunat veriore, si dhe 10 milionë euro duhet të sigurohen nga doganat që mblidhen në Fondin për Zhvillimin e Veriut”, ka përsëritur Duli.