Xhafer Tahiri flet për rastin e skamnorit të Vushtrrisë

Xhafer Tahiri flet për rastin e skamnorit të Vushtrrisë

Kryetari i Komunës së Vushtrrisë, Xhafer Tahiri ka reaguar në lidhje me rastin e qytetarit, Sabri Beqiri ku pretendohet se i njëjti ka paguar 417 € për varrimin e nënës.

Tahiri në një postim të tij në rrjetin social Facebook ka thënë se qytetarët e Komunës së Vushtrrisë që nga 1 janari 2018, nuk paguajnë për shpenzime të varrimit pasi siç tha ai këto shpenzime i mbulon Komuna.

Sipas tij, refuzimi i kryerjes së shërbimeve të varrimit për qytetarët, aq më tepër rastet në nevojë janë të pa pranueshme dhe kundër praktikave të bashkësive fetare në Kosovë.

Tahiri tregoi se në një takim që ia ka bërë sot Këshillit të Bashkësisë Islame në Vushtrri i është sqaruar se paratë të cilat i ka paguar, Sabri Beqiri, në emër të anëtarësisë i janë kthyer të gjitha.

Lexoni më poshtë postimin e plotë të tij:

“Qytetarët e Komunës së Vushtrrisë që nga 1 janari 2018, nuk paguajnë për shpenzime të varrimit. Këto shpenzime i mbulon Komuna.

Lidhur me rastin e qytetarit Sabri Beqiri ku pretendohet se i njëjti ka paguar 417 € për varrimin e nënës, sot kam takuar udhëheqësit e Këshillit të Bashkësisë Islame në Vushtrri ku më është sqaruar se komuna ka kryer të gjitha obligimet e parapara.

Gjithashtu në KBI më njoftuan se paratë të cilat i ka paguar qytetari Sabri Beqiri, në emër të anëtarësisë, i janë kthyer pasi është evidentuar si rast skamnor.

Refuzimi i kryerjes së shërbimeve të varrimit për qytetarët, aq më tepër rastet në nevojë është i pa pranueshëm dhe kundër praktikave të bashkësive fetare në Kosovë.

Këto të fundit janë shembulli më i mirë i bashkëjetesës fetare dhe solidaritetit në vend dhe si të tilla duhet të dëshmohen e të çmohen vazhdimisht.

Rasti i Sabri Beqiri dhe afër 100 familje tjera në Vushtrri ndihmohen rregullisht nga KBI me miell dhe pako tjera ushqimore në kuadër të programeve humanitare.

Si duket deri te mos marrëveshja për pagesën prej 417€ ka ardhur për shkak të moskomunikimit të duhur qytetar-KBI.

Komuna e Vushtrrisë gjithnjë do të mbetet në shërbim të qytetarëve dhe të ofroj përkrahje pa rezervë brenda mundësive që ka”, ka shkruar ndër të tjera kryetari i Komunës së Vushtrrosë, Xhafer Tahiri.