Aktorja e njohur rrëfen si i mbijetoi problemeve në tru

Aktorja e njohur rrëfen si i mbijetoi problemeve në tru

Kasti i aktorëve të “Game of Thrones” është më i zënë se kurrë këto kohë, duke promovuar shfaqjen televizive në intervista të ndryshme apo në ture në të gjitha shtetet e botës. E megjithatë, një nga aktoret protagoniste të serialit, Emilia Clarke, ka gjetur kohë që të rrëfejë për diçka vërtetë personale për “New Yorker” dhe të tregojë për kohën që vuajti nga dy aneurizma në tru.

Ajo tregoi se për herë të parë se u diagnostikua me aneurizëm, në moshën 24 vjeçare, kur sapo kishte mbyllur xhirimet për sezonin e parë të “Games of Thrones”: “Isha duke u ushtruar me trajnerin tim, kur ndjeva një shtrëngim në tru. U përpoqa ta injoroja dhimbjen dhe të vazhdoja, por nuk munda. I thashë trajnerit tim që duhet të pushoja. Gati duke u zvarritur shkova në dhomën e zhveshjes, futa kokën në mes të gjunjëve dhe u ndjeva shumë, shumë keq. Ndërkohë, dhimbja në kokë ishte sikur po më godisnin, sikur më gjuanin me thikë dhe vazhdonte të bëhej më keq. E dija çfarë po ndodhte, truri im ishte dëmtuar”.

Më pas Clarke tregon se një grua e kishte ndihmuar të shkonte në spital, ku pas vizitës ju komunikua se vuante nga një hemorragji subarankoide, që do të thotë se kishte gjakderdhje në tru. Aneurizmat shpesh janë fatale, duke u bërë shkak për vdekjen e dikujt, ose mund të japin dëme të pariparueshme në tru. Për të parandaluar një gjë të tillë, Emilia ju nënshtrua një operacioni mini-invaziv në kokë, i cili zgjati tre orë, edhe pse fillimisht kishte hezituar pasi “nuk kishte kohë për kirurgji në kokë”.

Kur u zgjua nga operacioni, në të cilin asaj ju fut një tel në një nga arteriet që shkojnë në tru dhe në zemër, gjithçka ishte në rregull dhe për dy javë nuk pati asnjë komplikacion. Më pas, siç tregon aktorja e njohur, erdhi një periudhë ku nuk mund të mbante mend as emrin e saj.

“Nuk kisha përjetuar asnjëherë një frikë të tillë, mund të shihja jetën që më priste me këtë gjendje dhe nuk ja vlente të jetoja. Jam një aktore, duhet të mbaj mend shumë rreshta dhe fjalë. Në atë moment nuk mund të kujtoja as emrin tim. Herë pas herë i thoja stafit mjekësor të mos më shpëtonin, të më linin të vdisja”- rrëfen 32 vjeçarja.

Pas disa ditësh ajo ja doli të fliste sërish dhe të mbante mend më shumë, megjithatë doktorët e paralajmëruan se kishte një tjetër aneurizëm në anën tjetër të trurit, që mund të shpërthente në çdo moment. Gjithsesi u vlerësua që ajo mund të vazhdonte të bënte intervista e të dilte në televizion, edhe pse ishte tmerrësisht e vështirë pasi siç tregon aktorja, i është dashur të marrë sasi të konsiderueshme morfine midis intervistave. Pasi filmoi sezonin e dytë të “Game of Thrones” Emilia sërish ndjente dhimbje dhe lodhje, por ja doli që të vazhdonte me punën e saj. Vetëm pasi mbaroi sezoni i tretë i serialit, ajo u shtrua sërish në spital, sepse aneurizma e dytë ishte rritur në përmasa dhe duhet të operohej. Kjo ishte dhe më e vështirë, pasi ndërhyrja u bë direkt në kafkë këtë herë. Për të, periudha post-operatore ishte më e dhimbshme herën e dytë dhe gjithçka u bë më e komplikuar, pasi kishte frikë se publiku do ta merrte vesh për gjendjen e saj. Ajo pranon se ka gënjyer disa herë nëpër intervista, madje dhe miqtë e saj, por e kishte bërë për shkak se ende nuk ishte gati të tregonte të vërtetën.

Gjithsesi, tani që kanë kaluar vite nga operacionet, Emilia është shëruar 100% dhe e ka lënë pas këtë kohë të vështirë në jetën e saj. Kjo gjë mund të shihet dhe nga buzëqeshja e madhe që ka në fytyrë në çdo dalje publike. /blitz.al/