“Notre Dame të kthehet në pishinë!”

“Notre Dame të kthehet në pishinë!”

Arkitektura e stilit gotik është shumë e vjetruar… Të paktën kështu mendon firma franceze që ka propozuar një projekt për të shndërruar çatinë e Katedrales së “Notre Dame” në një serrë gjigante.

Por ky nuk është i vetmi projekt i propozuar për ndërtimin e Katedrales së “Notre Dame”. Studio nga e gjithë bota kanë publikuar projektet arkitekturore për ndërtimin e Katedrales, nga të cilat ka edhe nga ata që janë vërtetë të çuditshëm.

Franca është përfshirë momentalisht nga një debat për mënyrën se si duhet rindërtuar katedralja pasi u dogj pjesërisht më 15 prill. Sipas firmës “NAB”, silueta e godinës nuk do të ndryshonte, por vetëm qëllimi i saj do të ishte më modern dhe më “ambientalist”.

Projekti më i çuditshëm mund të cilësohet ai i studios suedeze “Ulf Mejergren”, që synon ta shndërrojë katedralen në një pishinë gjigante.

Po ashtu, mund të vlerësohet edhe projekti i një arkitekti slloven, i cili ka hedhur idenë që kisha të “arrijë qiellin” me një projekt të ngjashëm me direkun e një anije.

Kostot e riparimit të katedrales mendohet se do të kalojnë 1 miliardë dollarë dhe për këtë qëllim është çelur edhe një konkurs ku janë ftuar firma arkitekturore nga e gjithë bota. Deri tani, më shumë se 835 milionë dollarë janë mbledhur në fonde të dhuruara nga miliarderë të ndryshëm, por edhe fëmijë.

Presidenti Emmanuel Macron u zotua që “Notre Dame” do të rindërtohet për 5 vite, ndërsa arkitektët mendojnë se do të duhen dekada për të rikthyer siç ishte një prej monumenteve më të rëndësishme të Parisit, që vizitohet çdo vit nga 13 milionë njerëz.