Jahjaga: Të largohet fotografia e viktimës, faktet të dorëzohen ku duhet

Jahjaga: Të largohet fotografia e viktimës, faktet të dorëzohen ku duhet

Ish-presidentja e Kosovës, Atifete Jahjaga, ka bërë thirrje që të mos ekspozohet fotografia e gruas së dhunuar nga forcat serbe, të cilën e ka publikuar deputetja e PDK-së, Flora Brovina. 

Ajo përmes një postimi në Facebook, ka thënë se dëshmitë mbi krimet që ka kryer Serbia ndaj popullit tonë gjatë luftës duhet të deponohen në gjykatat përkatëse.

Artikulli i plotë i Jahjagës: 

Një goditje e rëndë u është bërë sot mijëra të mbijetuarve të dhunës seksuale gjatë luftës në Kosovë me publikimin e pamjeve që tregojnë dhunimin e një gruaje nga forcat ushtarake serbe gjatë luftës! Është e gërditshme, e neveritshme, dhe e turpshme se si një depuetete e Kuvendit të Kosovës, e cila dikur ngriste dorën kundër të drejtave të grave e burrave të dhunuar seksualisht gjatë luftës në Kosovë, sot shfrytëzoi pikërisht godinën e Kuvendit për të publikuar para mediave një fotografi që thuhet se dokumenton aktin e dhunimit të një gruaje shqiptare nga tre ushtarë serbë.

Veprimi i deputetës është jonjerëzor, joetik e joligjor! Publikimi fotografisë cenon rëndë privatësinë e viktimës dhe mund të çojë në zbulimin e identitetit të një dëshmitareje potenciale të krimit që Serbia ka kryer ndaj popullit tonë. Publikimi i asaj fotoje ri-traumatizon viktimën dhe të gjithë të mbijetuarit e dhunës seksuale gjatë luftës në Kosovë dhe dekurajon të mbijetuarit që të dalin përpara me të vërtetën mbi krimin që është kryer mbi trupat e tyre.

Publikimi i fotografisë është goditje e sërishme ndaj dinjitetit të gruas që shihet në fotografi dhe është një goditje e rëndë për luftën tonë për drejtësi për mijëra gra e burra që u bënë cak i një fushate të egër të dhunimit seksual që Serbia kreu në Kosovë gjatë luftës së 1998-1999 për ta spastruar Kosovën etnikisht nga shqiptarët! Dëshmitë mbi krimet që ka kryer Serbia ndaj popullit tonë gjatë luftës duhet të deponohen në gjykatat përkatëse!

U bëjë thirrje mediave që të largojnë fotografinë nga platformat e tyre për të mos e dëmtuar viktimën edhe më shumë! U bëjë thirrje autoriteteve të drejtësisë që të hetojnë këtë veprim dhe të veprojnë në përputhje me ligjin!

Të mbijetuarit e dhunës seksuale gjatë luftës në Kosovë nuk janë vegla që mund t’i përdorni për spektaklet e juaja politike!


MË SHUME NGA Aktuale