Regjistrohen 105 raste të reja me fruth në Maqedoni

Regjistrohen 105 raste të reja me fruth në Maqedoni

Duke përfshirë edhe ditën e sot, janë regjistruar 105 raste të reja të fruthit, 49 prej tyre në Shkup dhe 56 në qytete të tjera anembanë vendit. Deri më tani janë regjistruar gjithsej 1.625 pacientë me këtë sëmundje, njoftoi Zharko Karaxhovski nga Instituti për Shëndet Publik, anëtar i Komisionit për Sëmundjet Infektive në Ministrinë e Shëndetësisë.

Sipas tij, ky është numri më i madh i të sëmurëve me fruthin në 25 vitet e fundit. Në lidhje me 105 rastet e reja, Karaxhovski theksoi se 77.1 për qind janë persona të pa vaksinuar, ose të vaksinuar me një dozë.

“Deri më tani gjithsej 27.000 persona janë vaksinuar që nga shpallja e epidemisë, megjithatë 15.600 persona janë të prekshëm ndaj vaksinimit dhe deri më tani nuk janë vaksinuar. Për këtë epidemiologët bëjnë thirrje që të vazhdohet me vaksinimin”, tha Karaxhovski.

Ministria e Shëndetësisë sot deklaroi se nga personeli mjekësor janë vaksinuar gjithsej 1.246 persona.