Mustafa thotë se nuk ka marrë ftesë për ceremoninë e djeshme

Mustafa thotë se nuk ka marrë ftesë për ceremoninë e djeshme

Kryetari i Lidhjes Demokratike të Kosovës, Isa Mustafa, ka thënë se nuk ka marrë asnjë ftesë për pjesëmarrje në ceremoninë e djeshme të shënimit të 20-vjetorit të çlirimit të vendit.

Mustafa ka pohuar se nuk e di se si ka vepruar Protokolli i Shtetit me ftesa, por që ai nuk ka marrë ftesë për asnjë aktivitet.

Megjithatë, Mustafa ka pohuar se ndihet krenar për ceremoninë e mbajtur dje në sheshin Skënderbeu, dhe se ketë shesh e kanë ndërtuar me përkushtim në kohën kur LDK e drejtonte kryeqytetin.

Shkrimi i plotë:

“Të nderuar qytetarë

Po shoh se është bërë temë mospjesëmarrja ime në ceremoninë e shënimit të njëzetvjetorit të çlirimit të vendit.

Nuk kam marrë pjesë, sepse nuk më ka ardhur ftesë për këtë ceremoni dhe për asnjë aktivitet tjetër.

Nuk mund ta di se si ka vepruar Protokolli i Shtetit, a më ka pasur në listë apo jo, si kryetar të LDK-së, shef të opozitës, partisë më të madhe opozitare sot dhe partisë shtetëformuese gjatë tridhjetë viteve sa ekziston ajo, apo si Kryeministër i qeverisë së kaluar.

Në Selinë e LDK-së, më kanë informuar se kanë ardhur ftesa për disa familje të dëshmorëve dhe veprimtarëve të LDK-së. Tjetër jo.

Nuk ka datë më të rëndësishme për çdonjërin nga ne se ajo e çlirimit të Kosovës. Prandaj pjesëmarrja ime ose e njërit nga nënkryetarët e LDK-së, për arsye të shkaqeve të mia shëndetësore, do të ishte e padiskutueshme. Çlirimi sikurse edhe pavarësia nuk janë pronë e askujt, janë e arritur, mburrje dhe pasuri e çdonjërit nga ne.

Fundja, edhe pse nuk kisha ftesë të marr pjesë në këtë ceremoni, ndjehem krenar se ajo u mbajt në Sheshin Skënderbeu të qytetit tim, të cilin aq me përkushtim e ndërtuam sa unë dhe LDK drejtonim Prishtinën, dhe pran monumentit të Skënderbeut që, po ashtu, e ngritëm pas çlirimit me para të mbledhura nga bashkatdhetarët tanë, kur ishim si qeveri në egzil e LDK-së. Dhe, se në këtë solemnitet ishin miqtë tanë, heronjtë të çlirimit të Kosovës”.