Malishevasit shpëtojnë nga rriqrat

Malishevasit shpëtojnë nga rriqrat

Në Malishevë nuk është shënuar asnjë rast i infeksionit me Ethet Hemorragjike.

Në Komunën e Malishevës nuk është shënuar asnjë rast i infeksionit me Ethet Hemorragjike Krime Kongo (EHKK), mirëpo shqetësuese për organet përgjegjëse komunale, është ndërprerja e fushatës së repelimit të kafshëve, e cila është masa më efikase në luftimin dhe parandalimin e EHKK.

Kështu ka deklaruar nënkryetari i Komunës së Malishevës, Hajdin Berisha, i cili edhe e drejton shtabin komunal për menaxhimin e situatës me EHKK, pas vizitës që ka bërë QKMF-së në Malishevë, së bashku me drejtorin për shëndetësi, Liridon Hoti, ku janë njoftuar me gjendjen e rasteve të thumbuara nga rriqrat.

Siç njofton Komuna, Berisha ka bërë të ditur “bazuar në të dhënat në QKMF në Malishevë dhe në Klinikën Infektive në Prishtinë, deri më tani asnjë rast nga Malisheva nuk është regjistruar i infektuar me virusin e EHKK, dhe ky është viti i pestë me radhë që nuk ka raste të infektimit nga ky virus”.

Për shtabin komunal që merret me marrjen e masave për luftimin dhe parandalimin e etheve hemorragjike krime kongo në Malishevë, shqetësues është ndërprerja e repelimit të kafshëve, pasi kjo është masa më efikase.

“Pavarësisht se Instituti Kombëtar i Shëndetit Publik, në vazhdimësi lëshon komunikata për gjendjen epidemiologjike me EHKK, dhe në këto komunikata thuhet se profesionistët janë duke bërë repelimin e kafshëve në terren, kjo nuk qëndron, sepse repelimi është ndërprerë në fazën e dytë, ndërsa vitin e kaluar nuk është realizuar fare”, thuhet në deklarimin e shtabit komunal, për menaxhimin e EHKK.

Ky shtab, muaj më parë kur është ndërprerë repelimi i kafshëve, kishte reaguar duke kërkuar nga organet përgjegjëse, që ta realizojnë repelimin, pasi është masa më efektive.

Përndryshe, në Komunën e Malishevës, deri më sot janë thumbuar nga rriqrat 969 persona, të cilët janë trajtuar në QKMF në Malishevë. Asnjë rast deri më sot nuk është regjistruar me infeksion, ndërsa ky është viti i pestë pa infeksion dhe viti i gjashtë pas raste me fatalitet, si pasojë e infeksionit me EHKK, virus i cili bartet tek njeriu përmes rriqrave.