Qalaj kërkon aktivitete të shtuara të policisë gjatë sezonit veror

Qalaj kërkon aktivitete të shtuara të policisë gjatë sezonit veror

Drejtori i Përgjithshëm i Policisë së Kosovës, Rashit Qalaj sot ka realizuar takim me stafin menaxhues, përfshirë drejtorët e drejtorive rajonale të Policisë dhe shefat e njësive të trafikut rajonal dhe autostradë, nga të cilët ka kërkuar aktivitete të shtuara të policisë gjatë sezonit veror.

Sipas një komunikate të Policisë, në këtë takim u diskutua për gjendjen e përgjithshme të sigurisë në vend duke përfshirë edhe sigurinë në trafikun rrugor.

“Referuar të dhënave statistikore për gjashtëmujorin e parë të këtij viti krahasuar me periudhën e njëjtë të vitit të kaluar, ka rezultuar se ka rënie të veprave penale dhe të aksidenteve në trafik. Po ashtu është diskutuar edhe për masat dhe aktivitetet policore në ditët në vijim gjatë sezonit veror, ku u kërkua aktivitet shtesë dhe prezencë policore në çdo pjesë të vendit, përfshire rrugët lokale/fshatit, rajonale, nacionale dhe autostrada. Meqë këtë periudhë kohore e karakterizon edhe ardhja e bashkatdhetarëve dhe organizimi i ahengjeve të ndryshme familjare, kërkohet nga policia që të jetë sa më tepër prezent dhe në të njëjtën kohë të ndërmerren masa për ofrimin e sigurisë në trafik dhe masa parandaluese të dukurive të tjera të kundërligjshme. Policia do të vazhdojë bashkëpunimin dhe bashkërendimin e aktiviteteve edhe me institucionet lokale dhe ato qendrore”, thuhet në komunikatë.

Policia e Kosovës ka kërkuar nga qytetarët që në ahengjet familjare të mos përdorim armët për të festuar, të ruhet rendi dhe qetësia publike, si dhe pjesëmarrësit në trafik të respektojnë rregullat e trafikut rrugor.