“Smile Albania”, 500 të rinj mirëpresin turistët në Shqipëri

“Smile Albania”, 500 të rinj mirëpresin turistët në Shqipëri

Ministri i Turizmit dhe Mjedisit Blendi Klosi deklaroi sot se “Smile Albania” ka hyrë në edicionin e dytë me 500 të reja e të rinj të punësuar për sezonin veror.

“Gjatë vitit 2019 në projektin e ri Smile Albania jo vetëm do të presim me buzëqeshje turistët e huaj por të reja e të rinj që janë 500, e që vijnë nga bankat e universiteteve dhe janë këtu në vazhdim të paktit tonë me universitetin, që janë në vazhdim të një procesi konkurrues”, tha Klosi.

“Këtë vit aplikuan tre herë më shumë se një vit më parë dhe kjo prezencë dëshmon se projekti ka hyrë në një fazë të re dhe është shumë më ndryshe nga një vit më parë”, tha ai.

Po ashtu, Klosi shtoi se të rinjtë e Smile Albania do jenë ndihmës dhe orientues, rojtarë dhe gjurmues të zbatimit të standardeve në turizmin shqiptar.

“Do të duhet shumë që gjithë secili nga ju në bazë të trajnimi që është bërë edhe falë asistencës së projekteve tuaja të jetë një vëzhgues i vëmendshëm i problematikave që kanë plazhet tona, problemat që ka pastërtia në mjediset që ofrojnë turizëm. Ne e kemi shumë të nevojshme që të rinjtë e Smile Albania të jenë 500 agjentë të institucioneve të politikave të turizmit për të evidentuar çdo shqetësim që kanë plazhet tona”, tha ai.

Gjithashtu Klosi tha se këtë vit numri i turistëve është në rritje.

“Turizmi nuk filloi me entuziazëm si një vit më parë por numri i turistëve është në rritje”, tha Klosi./atsh/