Festivali “Agrofesta” këtë vit me shumë risi

Festivali “Agrofesta” këtë vit me shumë risi

Në Krushë të Madhe të Rahovecit, të shtunën nis edicioni i gjashtë i festivali tradicional të perimekulturës “Agrofesta”.

Ky festival synon të promovojë produktet bujqësore dhe kulturën krushjane të punës. Organizatorët thonë se përveç aktiviteteve të shumta, vizitorët do të kenë mundësi të blejnë produkte me çmime promovuese.

Banorët e Krushës së Madhe dhe rrethinës, që “bukën e nxjerrin nga toka”, këtë të shtunë kanë festë, kur edhe fillon “Agrofesta”.

Selami Hoti, koordinator i festivalit tha se qëllimi i Agrofestës është promovimi i produktet bujqësore. Ai i tha Radio Kosovë se në kuadër të festivalit do të organizohen aktivitete të shumta.

“Është një ditë e gëzune për të gjithë fermerët të cilët janë prodhues të prodhimeve të ndryshme të perimkulturës. Agrofesta do të hapet në ora 11, me performancën e fëmijëve të shkollës. Pastaj do të vazhdohet me Agrotregun, ku fermerët do të mund t’i ekspozojnë produktet e tyre të cilat vizitorët do të mund t’i blejnë me çmime promocionale”, tha ai.
Vizitorët e festivalit, perveç blerjes së produkteve bujqësore, do të kenë mundësi të shohin edhe përgatitjen e turshive dhe ajvarit nga gratë krushjane. Fahrije Hoti, drejtoreshë e “Kooperatiës Krusha”, tregon se këtë do ta bëjnë edhe gratë që punojnë në këtë kooperativë.
“Gratë e tona tradicionalisht marrin pjesë dhe përgatisin turshitë dhe ajvarin në fushë të hapur. Kështu ne i promovojmë produktet tona dhe i ofrojmë konsumatorëve ato që i bëjmë në vazhdimësi në kooperativë. I kisha lutur të gjithë kosovarët që të marrin rrugën drejt Krushës dhe të vijnë këtu sepse kanë cka shohin”, tha ajo.
Në edicionin e gjashtë të festivalit tashmë tradicional të perimekulturës “Agrofesta”, do të mbahet edhe një koncert, ku do të performojnë reperët kosovarë MC Kresha dhe Lyrical Son.

Autor: Pajtim Çuni , Radio Kosova