Kurti për Xhevdet Ferrin Guximi i Margiosë dhe Trimit mbeten porosia për ne

Kurti për Xhevdet Ferrin Guximi i Margiosë dhe Trimit mbeten porosia për ne

Kryetari i Lëvizjes Vetëvendosje, Albin Kurti, ka përkujtuar aktorin nga Shqipëria, Xhevdet Ferriin, i cili ndërroi jetë në moshën 59 vjeçare.

Kurti përmes një postimi duke lavdëruar aktrimin e tij tha se vepra në të cilin luajti ai, ende e përndjekin shoqërinë shqiptare.

Kurti që e quajti mbresëlënës filmin “Përrallë nga e kaluara” mori shembull guximin e Marigosë dhe i trimit mbeten porosia për ne.

Postimi i plotë:

Mora vesh se sot paska vdekur aktori i mirënjohur, Xhevdet Ferri. Në moshën 59 vjeçare, prej një sëmundjeje të rëndë. Fytyra e tij, fuqia shprehëse e mimika përcillte bashkë me guximin e paepur edhe një lloj melankolie, përballë situatave shoqërore të cilat duken si të pandryshueshme.
Kështu në filmin “Vitet e pritjes”, ku luan rolin e mërgimtarit të kthyer pas shumë vitesh në atdhe, ku fatkeqësisht pritet si i huaj, dhe e gjen vendin pa përparim, me të njëjtat probleme të kahershme. Por mbase më mbresëlënës është filmi “Përrallë nga e kaluara”, ku Xhevdet Ferri luan rolin e trimit.

Edhe ai film, krijuar mbi veprën e shkruar para më se një shekulli prej Çajupit, rrëfen fatalitetin e shoqërisë të marrë peng prej një mentaliteti të vjetër, që i ka ikur koha. Duket sikur ky mentalitet i vjetërsuar vijon ta përndjekë shoqërinë shqiptare. E megjithatë, guximi i Marigosë dhe i trimit mbeten porosia për ne, sepse shoqëria duhet të përparojë e Gjini duhet të rritet.

U prehsh në paqe Xhevdet Ferri, ngushëllime familjarëve, kolegëve dhe publikut të kinemasë. Mbetesh i paharrueshëm në kujtesën tonë të përbashkët.