Shpronësimet në autostradën Bllacë-Shkup,100 euro për metër katror

Shpronësimet në autostradën Bllacë-Shkup,100 euro për metër katror

Banorët e Bllacës janë në pritje të përfaqësuesve të shtetit për t’ju komunikuar ofertën e shtetit për tokat e tyre. Janë 68 pronarë, në parcelat e të cilëve do të kalojë autostrada e re Shkup-Bllacë.

Pas takimit, bllacalinjtë shprehen revoltën se nuk iu pëlqyen kushtet e shpronësimit dhe thonë se do të ankohen.

“Jo, asnjëherë! Unë e ceka edhe në mbledhje se unë kërkoj 100 euro se është tokë e imja ‘dem baba dem’ edhe unë prej asaj kam jetuar. Nëse nuk na japin ne do të shkojmë edhe me gjyq. E ceka edhe në mbledhje që do të shkoj deri në Strasburg”, tha një pabor.

Ky banor i Bllacës thotë se një herë janë mashtruar nga shteti kur nëpër tokën e tyre ka kaluar rruga e vjetër dhe terminali i doganës. Atëherë thotë se pa i pyetur fare u kanë paguar nga 25 marka.

“E kanë ndarë atë për trase të rrugës edhe neve as nuk na kanë pyetur. Madje paret i kanë hedhur në xhirollogari se i kanë pasur dokumentet tanë, sepse na kanë marrë nga rruga që e kanë ndërtuar për terminal, neve na kanë marr edhe dy pjesë të tjera të tokës.”

 Tjetri thotë se kjo nuk do të ndodh sërish. Shqetësimi i tij është se a do t’i blihet e gjithë parcela apo vetëm pjesa ku kalon traseja. Nëse trualli i ndahet në dysh, ai thotë se do t’u mbetet pa rrugë.

 “Neve së pari nga Kadastra na kanë hequr 60 ari tokë, shteti i Maqedonisë na ka heq. Edhe një hektar e gjysmë ku më mbetet mua? Kah shkoj unë, nga të fluturoj unë? Veç të shkoj me helikopter se nuk kam nga të shkoj tek ara ime. S’kam hyrje-dalje sepse këndej i bie autostrada në anën tjetër malet.”