Medina Pasoma/RTKlive

Si përpjekje e bashkëdyzimit të namit të vjetër historik dhe sjelljes së vlerave moderne muzikore, “Akordet e Kosovës 2026” çdo ditë është më afër të bërit realitet.

Drejtori artistik i “Akordeve të Kosovës 2026”, Florent Boshnjaku, në një intervistë dha detaje nga ngjarja që do të mbahet më më 30, 31 tetor dhe 1 nëntor në Prishtinë.

“Këtë vit kemi vendosur ta rikthejmë emrin e një festivali që ka peshë të jashtëzakonshme historike. Është nder i veçantë të jem në cilësinë e drejtorit artistik, por me ekipin që jemi duke punuar nën udhëheqjen e drejtorit të Festivalit, Rilind Gërvalla, jemi duke u mundua me sjellë diçka të veçantë dhe normalisht duke e respektuar historinë dhe peshën që e mban ky emër, duke shikuar përpara dhe duke përgatitur një program cilësor televiziv”, tha ai.

Dy netët e para do të jenë dedikuar muzikës moderne, ndërkaq nata e fundit do të jetë skenë për zërat e rinj, përkatësisht fëmijët.

“Fëmijët e meritojnë ta krijojnë një traditë, përvojë në një skenë të tillë dhe është diçka e jashtëzakonshme sepse do të jenë të përcjellur live në orkestrën e profesionistëve dhe në një skenë jashtëzakonisht të madhe”, tha ai.

Boshnjaku shpjegoi se ëndrra për dërgimin e këngës fituese të Kosovës nga festivali në “Eurovision” vazhdon. Kësaj radhe përpjekjet bëhen edhe për “Junior Eurovision”.

“Pavarësisht rikthimit të emrit, festivali edhe me rregullore është një platformë e cila në momentin që RTK do të jetë pjesë e EBU-së dhe ngjarjes së ‘Euro Song’, ky festival do ta dërgojë këngën në ‘Euro Song’. Edhe për ‘Junior Eurovision’, që u dedikohet të rinjve, do të krijohet mundësia që fituesi i festivalit për fëmijë, i cili organizohet në kuadër të ‘Akordeve të Kosovës’, të përfaqësojë Kosovën në këtë garë”, tha ai.

Ai tha se tri edicionet e kaluara kanë qenë dëshmi që RTK mund të organizojë një ngjarje të tillë, me skenë të madhe muzikore e profesionistë të vyer të përfshirë në organizim.

Afati i aplikimit vazhdon të mbetet i hapur deri më 31 gusht 2026, në orën 23:59 dhe është i qasshëm në ueb-faqen zyrtare të RTK-së.

Për Mbrëmjen e Muzikës Moderne, ftohen të aplikojnë këngëtarë, kompozitorë dhe tekstshkrues nga Kosova, Shqipëria, Maqedonia e Veriut, Mali i Zi dhe diaspora shqiptare, me vepra të reja muzikore që pasqyrojnë zhvillimet bashkëkohore të muzikës shqiptare.

Ndërkaq, Mbrëmja e Muzikës për Fëmijë synon promovimin e talenteve të reja dhe të krijimtarisë muzikore për fëmijë. Të drejtë pjesëmarrjeje kanë fëmijët e moshës 9 deri në 14 vjeç, ndërsa në garë mund të përfshihen edhe kompozitorë e tekstshkrues nga të gjitha trevat shqiptare dhe diaspora.