Segregacia ano edukipe ani Jakovaki komuna

Sar si pe yekh informipe mekhlo vash o medie e organiazia Evropako Centro avsh Minoritetengo Integripe ECMI vakerla kay dengya ani kriselin o ovipe e segregipesko ano edukipe e RAE qhavorengo ani Jakovaki komuna.

Pe tetradi dive 16 Yanuari, avokati Bahtir Troshupa vazdingya akuza mamuy o Direktoriati e Edukipesko ani Jakovaki komuna. Akuza biqhaldili ano anav e jenengo kotar komunitetya Roma, Ashkalie thay Egipqanya kola pretendinena kay olenge qhavore ulavdile ani fundoni shkola ”Mustafa Bakija” ani Jakova. E shkola decisingya e siklovnen e angluna klasako kotar komunitetya Roma, Ashkalie thay Egipqanya ani yekh ulavdi klasa kotar olenge albanyune amala. Akuza pretendinela kay akaya praktika sitoy yekh forma e diskriminipeski kay ushkavela e Konstitucia, Krisi mamuy Diskriminipe sar vi Evropaki Konventa vash manushikane Hakaya. Akuza kerela kharipe kay te lenpe o bajakya sar si o rumipe e segregima klasako thay o qhavore kola siton qalavde kotar akava ovipe te transferingyon ani yekh multietnikuni klasa ayekha vi te siguringyol yekh kompensipe vash o namaterialune hasaripya kola ule sar rezultati e ushkavipesko e manushikane hakayengo. Evropako Centro vash Minoritetengo Integripe (ECMI) ani Kosova, ano ledeipe e Centroa vash Yuridikuno Azhutipe thay Regionaluno jamaipe, phikoinela e dadalaryen kola siton qalavde kotar akava ovipe ano gatisaripe akale ”stratejikune ovipesko”, sar kotor e proyektesko ”Vazdipe e Pozitivune Qalavipesko e Krisesko vash o Qalavde thay Marginalizime Grupe (GCM) ani Kosova”, financimo kotar Evropaki Unia thay menajimo kotar Ofisi e Evropka Komisiako ani Kosova.