Demonstracie ani Budapesta vash o anti romano dikhlaripe

Pe 13 yaniari 2013 ani Budapesta ko purano kurko, shelencar hungarezya kedindepe avri e obyektestar Fidesz, partia koya sitoy ano raipe ani protesta mamuy o racistyune vakeripya kerde kotar yekh jeno akala partiako, kova kerela komparacia e romengi sar ”malukatya”. E protesta organizisali kotar Demografikuni Koaliciengi grupa.

Ko nakhlo kurko sine nesavo publikuno krisipe vash yekh gazetako artiklo kerdo kotar Zsolt Bayer, akana kova sito komentatori, kote ov kerela komparacia kay o Roma siton sar malikatya. Bayer dengya respodipe vash o nevipya vash maripe ano yekh gav vash o Krequno kote nesave romane dizune posavde yekh grupa e atletengi, yekh kolendar nashlagya poro jivdipe. ”Yekh baro gendo e Romana populaciako na jenala sar te adoptingyol ano malipe. On na siton gatisarde te jivdinen mashkar o manusha. O Roma siton sar malukatya thay ovena sar malukatya,” hraminla o Bayer ani divuni gazeta Magyar Hírlap. Bayereske komentya krisinde ini e Vestuni lumia vash oleske ”politikune korektipya”, kote pretendingyola kay ov bangarela e romen. Palo akava ov qhivgya benzini ani yag e yaver hramipea kote ov hraminela kay ov ”khargya vash o res”, vakerindoy kay o ”Roma vay Gypsies” shay te jivdinen ani Hungaria numay o yavera musay ”te duryargyon kotar o malipe”. Agencie France-Presse raportinela kay o manusha kola adikerde demonstracia shrdinde poro marshi ano kotor e raipeske thanesko kote adikerene o flago e Evropaka Uniako thay Hungariako. Buderi adikernay banerya kote hraminela ”Vi me sim Rom”. On rodinde kay o Hungariako sherunominsitri Viktor Orbán te kerel deklaracia vash akava puqipe thay o Bayer te ovel duryardo kotar Fidesz. ”Te sine kay o sherunoministri na vakerla, ov ushkavela thay hohavela o manushikane hakaya,” deklaringya o Ágnes Vadai kotar Demorkativuni Koalicia. Roma reprezentinena 7 % kotar Hungariake 10 milionya dizune.