Ano rami e reformyengo kola lelile thay kola pandar phiravgyona ani yekhlin e Online Mediengo ani Kosovaki radio televizia, palo yekh periodi e ohto bershengo, RTK sherdingya e publikipea e nevipyengo e haricune komunitetyengo ano boshnyakuni, turkyuni thay ani romani qhib ani platforma online e RTK-esk, rtklive.com.

Akava sherdipe kerdilo ano ledeipe e Bordeske mangipyencar vash te implementingyol o Krisi vash o RTK, kova obliginla e RTK vash o realizipe e konstituciake hakayengo e serbyune komunitetesko thay e yaver haricune komunitetyengo ano deipe e publikune informipesko thay e ulavipesko e nevipyenge andripyengo dende kotar o publikuno transmiteri.

RTK sine kritikimo ano Raporti vash e Kosova kotar Evropaki Komisia, kova sine publikimo ko 2021 bersh, vash o nadikhlarno adikeripe e programyengo ano haricune komunitetyenge qhibya thay o na shukarno ovipe e RTK –esko ano internet.   

Odoleske ini akava angazhipe sito phiravipe e butyako vash te laqhargyol e situacia thay may shukarno funksionipe e Kosovake publikune transmiteresko.

RTK si te aqhol dendo vash te pherel piri misia ano informipe, edukipe thay loshalipe vash o sah Kosovake dizune, bi dikhle etniciteti ano ledeipe e RTK –eske Krisea thay e Kosovaka Konstitucia.

Autor: Daut Qulangjiu, RTK