GAP: Të drejtat e konsumatorëve s’po respektohen sidomos në sektorin bankar
BKT
Ekonomi

GAP: Të drejtat e konsumatorëve s’po respektohen sidomos në sektorin bankar

RTKlive

Instituti GAP ka mbajtur tryezë me temë diskutimi “Mbrojtja e konsumatorëve në sektorin bankar”.

Hulumtimi trajton një pjesë të veçantë të Ligjit për mbrojtjen e konsumatorëve, konkretisht seksionin për mbrojtjen e konsumatorëve në sektorin bankar.

Disa prej pyetjeve që adresohen janë: Sa i mbron ky ligj konsumatorët bankar në informimin e tyre para nënshkrimit të marrëveshjeve të kredisë? Sa ka punuar Banka Qendrore e Kosovës në trajtimin e ankesave dhe edukimin e qytetarëve rreth produkteve e instrumenteve financiare?

Blendi Hasaj nga Instituti GAP, tha se disa banka komerciale nuk iu ofrojnë qytetarëve informatat e nevojshme të cilat do tu mundësonin përzgjedhjen e produktit financiar.

“Ne kemi ende banka komercial në tregun e Kosovës që nuk e paraqesin në çmimorën e tyre normën e interes nëpër ueb faqe, poashtu nuk është krijuar një përmbledhje e tarifave dhe çmimeve për shërbimet të cilat i ofrojnë e të cilat do të ia lehtësoni qytetarit punë në përzgjedhjen e produktit financiar”.

Nora Jusufi, hulumtuese në Institutin GAP, theksoi se raporti shqyrton ligjin e ri për mbrojtjen e konsumatorëve për pjesën e marrëveshjeve të kredive, përmbajtjen e informatave në çmimoret e bankave, rolin e Bankës Qendrore të Kosovës (BQK) në mbrojtjen e konsumatorëve dhe obligimet ligjore përcjellëse. Një nga gjetjet kryesore ishte që ligji i ri për mbrojtjen e konsumatorëve parasheh krijimin e një formulari standard për informacionin para-kontraktor ku duhet të përfshihen të gjitha detajet e kontratave të kredive përfshirë një shembull për kalkulimin e Normës Efektive të Interesit, sic është e paraparë në rregulloren përkatëse që nga viti 2013. Po ashtu, ligji ka specifikuar afatin e mbylljes së kredive, ka ulur provizionin në rast të parapagimit të kredisë, si dhe parasheh vlerësimin e kredive bazuar në informatat e regjistrit të kredive të Kosovës, ndër të tjera.

Ndërsa, Vlora Osmani, Kryetare e Komitetit Ligjor të Shoqatës së Bankave të Kosovës, theksoi angazhimin e shoqatës gjatë procesit të krijimit të ligjit të ri për mbrojtjen e konsumatorëve. Po ashtu, ajo theksoi se bankat komerciale në Kosovë e respektojnë në tërësi ligjin në fjalë.

Kurse, Venera Agani, Drejtoreshë e Divizionit të Ankesave në BQK, foli për angazhimin e këtij divizioni në trajtimin e e ankesave të qytetarëve lidhur me shërbimet bankare, rolin e BQK-së në edukimin financiar të qytetarëve, dhe punën e BQK-së në monitorimin e bankave komerciale sa i përket trajtimit të ankesave të konsumatorëve.

Në tryezë morën pjesë pjesëmarrës nga Oda Ekonomike e Kosovës, anëtarët nga Këshilli për Mbrojtjen e Konsumatorit dhe përfaqësues të bankave.


MË SHUME NGA Ekonomi