Qeveria t’i dëgjojë ndërkombëtarët e ta heqë taksën
BKT
Ekonomi

Qeveria t’i dëgjojë ndërkombëtarët e ta heqë taksën

Taksa 100 përqind e vendosur sot një vit nga Qeveria Haradinaj ndaj Serbisë dhe Bosnje e Hercegovinës, e dëmtoi Kosovën në aspektin ekonomik e politik. Madje, njohësi i çështjeve ekonomike, Safet Gërxhaliu, po thotë se kjo masë është favori më i madh që Kosova ia ka bërë Serbisë.

Janë bërë një vit që kur Qeveria e Kosovës, në krye me Ramush Haradinajn, vendosi që produkteve që vijnë nga Serbia dhe Bosnje e Hercegovina, t’u vendosë taksë 100 përqind.

Ky vendim i ish-Kryeministrit të vendit, jo vetëm që i solli dëme ekonomisë së Kosovës, por liderët morën edhe kritika të ashpëra nga ndërkombëtarët sa i përket kësaj çështje.

Njëjtë po mendon edhe Ish-Kryetari i Odës Ekonomike të Kosovës, Safet Gërxhaliu.

Në një prononcim për Gazetën Metro, ai po e cilëson taksën 100 përqind si favorin më të madh që Qeveria e Kosovës ia ka bërë asaj serbe.

“Taksa nuk duhet të analizohet vetëm në gjendjen ekonomike. Në aspektin politik dhe integrues, ajo ka qenë një prej favoreve më të mëdha që Qeveria e Kosovës ia ka bërë asaj të Serbisë, e cila me këtë vendim ka arritur që përkrahësit më të mëdhenjë të pavarësisë së Kosovës, t’i shndërrojë në përkrahës të vet dhe kritik të Kryeministrit të Kosovës, Ramush Haradinaj”, ka thënë ai.

Pyetur se çfarë mendon rreth Qeverisë së re, dhe se a duhet t’i dëgjojë ajo ndërkombëtarët e ta heqë taksën, Gërxhaliu thotë se Kosova duhet ta marrë këtë vendim të rëndësishëm.

“Unë besoj, që vendimet e rëndësishme nuk duhet të bien në eufori. Është koha kur Kosova duhet të mësojë pjekuri politike. Por natyrisht, vendime të tillë duhet të merren duke bërë analiza dhe më pas të krijohen dy apo tri skenario, dhe tani të vendoset se më cilin është më mirë të veprohet”, tha Gërxhaliu për Gazetën Metro.

Kujtojmë se Ramush Haradinaj dha dorëheqje nga posti i Kryeministrit të Kosovës në fund të muajit korrik, pasi që u ftua për intervistim nga Gjykata Speciale.

Gjatë kohës sa ishte në qeverisje, Haradinaj mori kritika të ashpëra nga SHBA’të dhe BE’ja, të cilët taksën e cilësuan si një veprim që ndikoi në izolimin e vendit dhe ndërprerjen e proceseve themelore, si dialogu me Serbinë./gazetametro.net


MË SHUME NGA Ekonomi