Unioni i Gazetarëve Shqiptarë ndan çmimet për gazetarinë ekonomike
Sharr Travel

Unioni i Gazetarëve Shqiptarë ndan çmimet për gazetarinë ekonomike

Unioni i Gazetarëve Shqiptarë ka ndarë sot në Prishtinë çmimet "Vangjush Gambeta 2019”, për raportimin më të mirë ekonomik të publikuar gjatë këtij viti nga gazetarë tw sektorit tw ekonimisw nga Shqipëria, Kosova dhe Maqedonia.

Për raportimin më të mirë të vitit 2019 në lëmin e ekonomisë është nderuar gazetari Vali Qyrfyçi, ndërsa çmimin “Gazetari i Vitit” iu nda gazetarit Taulant Koplikaj.

Çmimi “ Vangjush Gambeta” për gazetarinë audio vizuele në Shqipëri iu nda Donald Jorgoni, ndërsa për mediat e shkruara në Kosovë, gazetares së Koha Ditore Saranda Ramaj, për Shqipëri Ledina Loga dhe për Maqedoninë e Veriut Vedat Memedaliu.

Kurse, me çmimin “ Karriera” ka nderuar redaktoren shumëvjeçare të Radio DW, Adelheid Feilce  dhe gazetaren e Zërit të Amerikës Laura Konda.

Me rastin e ndarjes së çmimeve vjetore, Kryetari i Unionit të Gazetarëve Shqiptar, Aleksander Çipa, tha se përmes kësaj ngjarje bashkojnë përfaqësuesit e institucioneve dhe gazetarëve të ekonomisë, të cilët ballafaqojnë pikëpamjet e tyre dhe sfidat që përjetojnë pavarësisht njësisë administrative ku jetojnë.

Ndarjes së çmimeve i ka parapri konferenca tematike “Ilegaliteti dhe legaliteti” ku pjesëmarrësit kanë theksuar se ekonomia gri është armiku kryesor i zhvillimit ekonomik dhe kanë nënvizuar nevojën e realizimit të ligjeve dhe strategjive qeveritare në luftim të ekonomisë ilegale.

Kryetari i Odës Ekonomike të Kosovës, Berat Rukiqi, tha se organizimi i ngjarjeve të tilla i kontribuon nevojës për trajtimin e ekonomisë jo formale dhe të vlerësohet puna e palodhshme e gazetarëve, që sipas tij duke e trajtuar problemin influencojnë që shumë çështje të marrin trajtimin e duhur nga ana e institucioneve.

Kurse, Nikolin Jaka, kryetari i Dhomës së Tregtisë dhe Industrisë Tiranë, tha se gazetarët me raportimet e tyre duhet të jenë objektivë dhe të orientuar drejtë ekonomisë dhe realitetit, derisa tha se është për keqardhje që disa persona devijojnë emisionet e tyre për shkak të klikimeve.

Në këtë tryezë ka marrë pjesë edhe deputeti i zgjedhur nga Lëvizja Vetëvendosje Liburn Aliu, i cili tha se në një vend kur është informaliteti në rritje dhe për kohë të gjatë atëherë është i lidhur me politikën.

 

Çmimin “Gazetari i Vitit” iu nda gazetarit Taulant Koplikaj, i cili kishte raportuar për fëmijët shqiptarë që ndodhen në kampet në Siri.

Ndarja e çmimeve “Vangjush Gambeta 2019” është bërë nga Unioni i Gazetarëve Shqiptarë, me mbështetje të JTI./KosovaPress/


MË SHUME NGA Ekonomi