Pakistani kërkon investime turke për të nxitur turizmin
Pakistani ka ftuar Turqinë të investojë në zonat veriore të vendit dhe të ndihmojë në rritjen e turizmit në rajonin piktoresk.
Media shtetërore Radio Pakistan sot bëri të ditur se oferta është parashtruar nga Ali Amin Gandapur, ministër për Çështjet e Kashmirit dhe Gilgit-Baltistanit, në një takim me Gökhan Umut, kreun e Agjencisë Turke për Bashkëpunim dhe Koordinim (TIKA) në Pakistan.
Rreth 2 milionë turistë vizitojnë zonat piktoreske Gilgit-Baltistan çdo vit, i tha Gandapur kreut të TIKA-s, duke theksuar mundësitë e jashtëzakonshme për investitorët turq dhe të huaj në sektorin e turizmit në rajon.
Ai tha se qeveria po punon për të ngritur zona ekonomike në Gilgit-Baltistan, të cilat do të hapin rrugë të reja për zhvillimin industrial në rajon.
Zonat ekonomike janë pjesë e Korridorit Ekonomik Kinë-Pakistan me vlerë prej miliarda dollarësh, një rrjet i gjerë rrugësh, hekurudhash dhe tubacionesh që synon të lidhë provincën veri-perëndimore kineze Xinjiang, që ka rëndësi strategjike për Kinën, me portin e Gwadarit në provincën jug-perëndimore pakistaneze të Balochistanit.
Rajoni malor Gilgit-Baltistan, i njohur dikur si Zonat Veriore, kufizohet me Kinën dhe është një hyrje për korridorin ekonomik.
Duke ndarë detaje të aktiviteteve të TIKA-s në Pakistan, Umut tha se agjencia është e përgatitur të ndërmarrë projekte zhvillimi në Xhamu dhe Kashmir të administruara nga Pakistani si dhe rajonit Gilgit-Baltistan.
"TIKA po punon me Pakistanin në sektorët e saj social, shëndetësor dhe arsimor dhe është gjithmonë e gatshme të bashkëpunojë për mirëqenien e popullit të Pakistanit", tha ai.
Mbështetja e Turqisë është "thelbësore" për Kashmirin dhe botën muslimane
Ministri pakistanez gjithashtu përshëndeti mbështetjen e palëkundur të Turqisë për popullin e Kashmirit dhe gatishmërinë e saj për të ngritur zërin për muslimanët e shtypur në të gjithë botën.
"Presidenti Recep Tayyip Erdoğan ka marrë gjithmonë një qëndrim të qartë për çështjen e Kashmirit dhe qeveria dhe populli i Pakistanit falënderojnë Turqinë për mbështetjen e saj të vazhdueshme", tha Gandapur.
Komentet e tij ishin të ngjashme me komentet e bëra nga Shehryar Afridi, kreu i Komitetit Parlamentar të Pakistanit për Kashmirin, i cili përshëndeti "rolin kryesor" të presidentit Erdoğan në botën muslimane dhe duke ngritur çështjen e Kashmirit në nivel ndërkombëtar.
"Turqia ka luajtur një rol kryesor në bashkimin e tërë komunitetit musliman kundër armiqve të saj të përbashkët", tha dje Afridi në një takim me ambasadorin turk, Mustafa Yurdakul.























