OBSH: Nivel alarmant i transmetimit të COVID-19 në Evropë

OBSH: Nivel alarmant i transmetimit të COVID-19 në Evropë

Niveli i transmetimit të COVID-19 është alarmant në Evropë, theksoi sot Organizata Botërore e Shëndetësisë (OBSH) që u shpreh e shqetësuar për lehtësimin e karantinës së vendosur ose të parashikuar në disa vende, përfshirë dhe Francën.

“Shifrat e shtatorit duhet të shërbejnë si alarm për të gjithë ne në mbarë Evropën, ku numri i rasteve të reja është tashmë më i lartë se ai i regjistruar në mars dhe në prill”, deklaroi sot drejtori i degës së Evropës të OBSH-së, Hans Kluge.

Organizata e OKB-së ka përjashtuar gjithashtu shkurtimin e rekomandimit të saj për një karantinë 14-ditore për të gjithë ata që kanë qenë në kontakt me virusin.

“Rekomandimi ynë 14-ditor i karantinës bazohej në kuptimin tonë të periudhës së inkubacionit dhe transmetimit të sëmundjes, ne vetëm do ta rishikonim atë bazuar në një ndryshim në kuptimin tonë të shkencës, që nuk është rasti deri më tani”, nënvizoi Catherine Smallwood, përgjegjëse për situatat emergjente në OBSH për Evropën.