Zero taksa për industrinë e kromit dhe bakrit
Qeveria depoziton ne Kuvend projektligjin, falen 500 milion lekë për 3 vite
Qeveria ka depozituar në Kuvend një projektligj që zeron taksen për industrinë e përpunimit të kromit dhe bakrit.
Sipas nismës parashikohet që për një periudhe 3 vjeçare të hiqet renta minerare për fabrikat që merren me pasurimin e kromit në ferrokrom dhe industrinë e përpunimit të mineralit të bakrit.
Efektet financiare të kësaj nisme parashikohet të jenë në 500 milionë lekë për arkat e shtetit.
Qeveria e argumenton këtë projektligj duke e lidhur nevojshmërinë e tij me efektet financiare që ka shkaktuar pandemia COVID-19 në sektorin minerar në vend, njofton euronews.albania.
Në relacion shprehet se kjo industri është ndër më kontributoret në bilancin tregtar dhe rrezikon falimentin si pasojë e efekteve financiare të COVID-19 dhe se masa financiare do të shërbejë në rritjen e vlerës së mineralit të kromit në mënyrë që mos të shiten si minerale të varfër por i pasuruar në ferrokrom.
Në grupin e mineraleve metalore që preken nga ky projektligj përfshihen kromi dhe bakri. Ky është grupi më i rëndësishëm i mineraleve, që përfaqëson rreth 85% të investimeve që realizohen çdo vit në industrinë minerale. Brenda këtij grupi, minerali i kromit ka peshën më të madhe me rreth 80% të investimeve.























