BB paralajmëron për një perspektivë ekonomike ‘të pasigurt’
BKT
Ekonomi

BB paralajmëron për një perspektivë ekonomike ‘të pasigurt’

Banka Botërore thotë se Europa dhe Azia Qendrore vazhdojnë të kenë vështirësi në frenimin e pandemisë së koronavirusit, e cila po mjegullon perspektivën ekonomike për rajonin.

Banka tha në raportin e tij më të fundit të Prospekteve Ekonomike Globale, të publikuar më 8 qershor, se rritja ekonomike për 23 vendet në rajon parashikohet të arrijë në 3.9% në vitin 2021, me rritjen e kërkesës së jashtme dhe çmimeve të mallrave industriale që do të kompensojnë ndikimin negativ të rritjeve më të fundit të rasteve të reja me COVID-19.

Megjithatë, Banka Botërore paralajmëroi se parashikimi mbetet “i pasigurt”, me shpërndarje të pabarabartë të vaksinave dhe tërheqjen e masave të brendshme të mbështetjes makroekonomike që peshojnë në rimëkëmbjen rajonale.

“Disa vende në Azinë Qendrore, Europën Lindore dhe Ballkanin Perëndimor, përballen me pengesa në prodhimin, sigurimin ose shpërndarjen e vaksinave nëpërmjet programit COVAX, ose marrëveshjeve të tjera”, vuri në dukje raporti. “Rritja mund të jetë më e dobët nga sa parashikohet nëse pandemia zgjat më shumë sesa pritet, kushtet e financimit të jashtëm shtrëngohen ose pasiguria e politikave dhe tensionet gjeopolitike rriten më tej”.

Raporti tha se një rritje e rasteve COVID-19 në fillim të vitit 2021 ka ndërprerë rimëkëmbjen fillestare ekonomike të shumë vendeve në rajon dhe paralajmëroi se “pasojat e pandemisë, përfshirë ngadalësimet e akumulimit të kapitalit fizik dhe njerëzor, do të shfaqen për një periudhë afatmesme nëse nuk adresohen”.

Banka Botërore gjithashtu vuri në dukje se zhvlerësimet e fundit të monedhës kanë ushtruar presion të mëtejshëm mbi çmimet, një shqetësim në rritje për disa ekonomi që ende po përpiqen të kalojnë efektet e dekadave të planifikimit të epokës sovjetike.

“Si rezultat i presioneve inflacioniste, normat e interesit janë rritur në një të tretën e ekonomive të rajonit deri në 2021”, tha banka, duke treguar si shembuj Armeninë, Bjellorusinë, Gjeorgjinë, Kirgistanin, Rusinë, Taxhikistanin, Turqinë dhe Ukrainën. Ekonomia ruse parashikohet të rritet me 3.2% në vitin 2021, ndërsa Ballkani Perëndimor pritet të rikthehet në 4.4% rritje vjetore. Europa Qendrore shihet si zona më e dobët në rajonin Europë-Azi Qendrore, me prodhimin ekonomik që është zgjeruar me vetëm 1.9% këtë vit.

Banka Botërore përfshin vendet e mëposhtme në parashikimet e saj për rajonin e Europës dhe Azisë Qendrore: Shqipëria, Armenia, Azerbajxhani, Bjellorusia, Bosnjë-Hercegovina, Bullgaria, Kroacia, Gjeorgjia, Hungaria, Kazakistani, Kosova. Kirgistani, Moldavia, Mali i Zi, Maqedonia e Veriut, Polonia, Rumania, Rusia, Serbia, Taxhikistani, Turqia, Ukraina dhe Uzbekistani.


MË SHUME NGA Ekonomi