Georgieva ushtroi presion ndaj punonjësve të Bankës Botërore
BKT
Ekonomi

Georgieva ushtroi presion ndaj punonjësve të Bankës Botërore

Georgieva ushtroi presion ndaj punonjësve të Bankës Botërore për të favorizuar Kinën në raportin e bankës.

Udhëheqësit e Bankës Botërore, përfshirë shefen ekzekutive të atëhershme, Kristalina Georgieva, ushtruan “presion të padrejtë” mbi stafin, për të rritur renditjen e Kinës në raportin e bankës “Doing Business 2018”, sipas një hetimi të pavarur të publikuar të enjten.

Raporti, i përgatitur nga firma ligjore WilmerHale me kërkesë të komitetit të etikës së bankës, ngre shqetësime në lidhje me ndikimin e Kinës në Bankën Botërore dhe gjykimin e Georgieva-s, tashmë drejtoresha menaxhuese e Fondit Monetar Ndërkombëtar – dhe presidentit të atëhershëm të Bankës Botërore, Jim Yong Kim.

Georgieva tha se nuk ishte dakord “me gjetjet dhe interpretimet” e raportit dhe kishte informuar bordin ekzekutiv të FMN-së.

Grupi i Bankës Botërore anuloi të enjten të gjithë raportin “Doing Business” mbi klimën e biznesit, duke thënë se auditimet e brendshme dhe hetimi nga WilmerHale kishin ngritur “probleme etike, duke përfshirë sjelljen e ish-zyrtarëve të Bordit, dhe të stafit aktual”.

Departamenti i Thesarit i SHBA-së, tha se po analizonte këto “zbulime serioze”.

Raporti nga WilmerHale citoi “presion të drejtpërdrejtë dhe të tërthortë” nga stafi i Jim Yong Kim për të ndryshuar metodologjinë e raportit dhe për të rritur pikët e Kinës.

Raporti tha se Georgieva dhe një kryekëshilltar, Simeon Djankov, kishin ushtruar presion për të “bërë ndryshime specifike në rezultatet e Kinës” dhe për të rritur renditjen e saj në një kohë kur banka po kërkonte mbështetjen e Kinës për një rritje të madhe të kapitalit.

Kim nuk iu përgjigj kërkesës për koment.

Renditja e Kinës në raportin “Doing Business 2018”, botuar në tetor 2017, u rrit shtatë vende duke arritur në vendin e 78-të, pas ndryshimeve të metodologjisë së të dhënave, krahasuar me projekt-raportin fillestar.

Raporti “Doing Business” i rendit vendet bazuar në mjediset e tyre rregullatore dhe ligjore, lehtësinë e kryerjes së biznesit, financimin, infrastrukturën dhe masat e tjera të klimës së biznesit.

 

Raporti vjen gati dy vjet pasi Georgieva mori drejtimin e FMN-së, pak para krizës më të madhe globale ekonomike në historinë 76-vjeçare të Fondit, të nxitur nga pandemia COVID-19.

Raporti nga WilmerHale citoi gjithashtu presione në lidhje me të dhënat e përdorura për të përcaktuar renditjen për Arabinë Saudite, Emiratet e Bashkuara Arabe dhe Azerbajxhanin në raportin “Doing Business 2020” të botuar në vitin 2019, por nuk gjeti asnjë provë që ndonjë anëtar i Zyrës së Presidentit të Bankës Botërore ose bordi ekzekutiv ishin të përfshirë në këto ndryshime.

Arabia Saudite u ngjit me 30 vende duke arritur në vendin e 62-të në raportin “Doing Business 2020”.

“Në vijim, ne do të punojmë në një qasje të re për vlerësimin e klimës së biznesit dhe investimeve,” tha Banka Botërore.


MË SHUME NGA Ekonomi