OAK dhe OE e Malit të Zi dakordohen për organizime të përbashkëta
Fadil Sertolli / RTKlive.com
Me qëllim të njoftimit reciprok, krijimit të linjave të komunikimit mes tyre e ndërlidhjen dhe rritjen e bashkëpunimit në fushat me interes të përbashkët, Oda e Afarizmit të Kosovës u takua me Odën Ekonomike të Malit të Zi, në Podgoricë, kështu thuhet në një njoftim për media nga Oda e Afarizmit të Kosovës.
Me këtë rast, Kryetari i OAK-së Skënder Krasniqi, falënderoi për pritjen dhe uroi znj. Nina Drakić për përzgjedhjen e saj si Presidente e Odës Ekonomike të Malit të Zi, duke shprehur gatishmëri për bashkëpunim të ngushtë mes të të dy odave në fushat me interes reciprok.
“Në kuadër të këtij takimi njoftues, palët u dakorduan për organizime e aktivitete të përbashkëta me qëllim të ndërlidhjes së bashkëpunimit mes bizneseve që të dy odat përfaqësojnë, si dhe implementimin e ideve dhe projekteve konkrete në këtë drejtim në mënyrë që të kemi një bashkëpunim më të madh me vendet në rajon”, thuhet në njoftim.
Po ashtu bëhet e ditur se Presidentja Drakić ka falënderuar Kryetarin Krasniqi dhe përfaqësuesit e OAK-së për vizitën, dhe uroi që ky takim të jetë vetëm fillimi i bashkëpunimit të ngushtë mes të të dy odave.























