Kurti: Synim i Qeverisë, transformimi i ekonomisë agro-rurale
BKT
Foto: Qeveria e Kosovës
Ekonomi

Kurti: Synim i Qeverisë, transformimi i ekonomisë agro-rurale

Valmira Saraçi Sahatçiu/RTKlive

Kryeministri Albin Kurti ka vizituar Panairin ndërkombëtar të agrobiznesit dhe ushqimit, “Agrokos”, që edicionin e 22 të tij.

Në këtë panair që po zhvillohet nën patronatin e zyrës së tij, Kurti vizitoi stendat e prodhuesve vendor derisa bisedoi me ta për rritjen e prodhimtarisë, rritjen e cilësisë së prodhimeve vendore, potencialin për zhvillim të mëtejmë dhe depërtimin në tregje ndërkombëtare.

Siç ka bërë të ditur zyra për media e qeverisë, kryeministri ritheksoi mbështetjen e Qeverisë për nisma që promovojnë sektorin agro- ushqimor dhe rrisin mundësitë e fuqizimit ekonomik në sektorin e bujqësisë.

Ndërkaq, përfaqësuesit e agro-bizneseve, sipas komunikatës biseduan me kryeministrin për mundësitë që panairi ofron për rrjetëzim dhe bashkëpunime mes agro-bizneseve vendore me ato të vendeve të rajonit, si dhe thellimin e bashkëpunimit mes sektorit publik dhe privat.

“Së bashku me Ministrin e Bujqësisë, Pylltarisë dhe Zhvillimit Rural, Faton Peci dhe Zëvendësministrin Imri Demelezi, Kryeministri Kurti theksoi synimet e Qeverisë për ta transformuar ekonominë agro-rurale, duke e bërë atë më gjithëpërfshirëse, produktive, të qëndrueshme dhe konkurrente në tregun e brendshëm dhe të jashtëm”, thuhet në komunikatën e Qeverisë.

Aty thuhet se me këto synime, Ministria e Bujqësisë, Pylltarisë dhe Zhvillimit Rural, në kuadër të Programit të Pagesave Direkte, subvencioneve për vitin 2022, ka planifikuar mbi 52 milionë euro përkrahje financiare për mbështetjen e kulturave dhe aktiviteteve bujqësore e blegtorale, ku nga këto veçse kanë përfunduar pagesat në vlerë prej rreth 42 milionë euro.

Ndërsa janë ndarë mbi 26 milionë euro në kuadër të Programit për zhvillim rural, grante në bujqësi.


MË SHUME NGA Ekonomi