Hoti adreson kritika për menaxhimin e inflacionit
Foto arkiv/ RTKlive
Ekonomi

Hoti adreson kritika për menaxhimin e inflacionit

A.B/RTKlive

Ish-kryeministri i Kosovës, Avdullah Hoti, përmes një shkrimi në “Facebook”, ka shkruar për çmimet e larta që janë tani në Kosovë dhe ka adresuar kritika ndaj pushtetit.

Sipas ish-kreut të ekzekutivit, sikur të uleshin ngarkesat tatimore dhe akciza në naftë, atëherë efektet do t’i ndienin të gjithë pa përjashtim.

“Inflacioni 12%, masat askund, qytetarët bartin pasojat. Inflacioni mesatar në dhjetor 2022 arriti në 12%, por për disa mallra dhe shërbime elementare, ku shpenzohet shumica e buxhetit familjar, arriti në: - 47% për shpenzime të transportit; 39% për lëndë djegëse;  31% për vajra dhe yndyra; 28% për qumësht; djathë e vezë; 21% për bukë e drithëra; 20% për mish; 18% për sheqer etj”, tha ai.

Teksa ka përmendur shembujt të vendeve të tjera, të cilat ulën barrën për qytetarë. “Disa i rritën pagat për normën e inflacionit,  disa i ulën ngarkesat tatimore, disa i ndihmuan qytetarët pa përjashtim në përballimin e kostos së jetesës, në veçanti subvencionuan çmimin e gazit dhe naftës, çmimet e të cilave u rritën më së shumti dhe ndikuan në rritjen e të gjitha çmimeve të tjera”, tha ai.

Sipas tij në Kosovë masa substanciale nuk shihen askund, me përjashtim të shtesave në pensione dhe asistencë që janë të përkohshme.

“Tatimi në Vlerën e Shtuar (TVSH) dhe akciza nuk u ulën, jo se nuk ishte e përballueshme për buxhetin, por për shkak se ishte propozuar opozita (nga LDK-ja). Si rezultat i inflacionit, shteti inkasoi shumë më tepër të hyra, të cilat nuk i shpenzoi dhe, si rezultat, ato u zhvlerësuan së paku për 12%. Por, pushtetarët u kujdesën për një pjesë të bizneseve-ato biznese që kanë kontrata me shtetin për investime kapitale. Kuvendi e miratoi ligjin diskriminues për punët publike, me të cilin bizneset mund të rrisin çmimin e kontratave me shtetin deri në 20% për shkak të rritjes së çmimeve të materialeve”, tha ai.

Sipas tij sikur të uleshin ngarkesat tatimore dhe akciza në naftë, atëherë efektet do t’i ndienin të gjithë pa përjashtim. “Nuk do të kishte pasur nevojë për këtë ligj diskriminues. Nuk do të ishin mbledhur mjete pa nevojë në buxhet, të cilat po zhvlerësohen”, tha ai.
 


MË SHUME NGA Ekonomi