Dogana e Oda e Farmacistëve bashkëpunojnë për kontroll në tregun e barnave
F.S / RTKlive
Dogana e Kosovës ka zyrtarizuar një Memorandum të Mirëkuptimit me Odën e Farmacistëve të Kosovës, ku synojnë forcimin e bashkëpunimit midis dy institucioneve si dhe të forcojnë masat për të garantuar sigurinë publike.
Në njoftimin për media nga Dogana e Kosovës, thuhet se memorandumi i Mirëkuptimit synon të nxisë shkëmbimin e informacionit, përvojave dhe njohurive, përmes pikës së caktuar të kontaktit.
“Së bashku me institucionet tjera, siç është Ministria e Shëndetësisë dhe ATK, Dogana e Kosovës luan rol të rëndësishëm në luftimin e informalitetit, ndërsa që kontrabanda me barëra është sfidë që haset shpesh në operacionet kundër kontrabandës. Konfiskimet e bëra nga Dogana e Kosovës nuk synojnë vetëm kontrabandistët, por synojnë edhe parandalimin e shpërndarjes së barnave të pakontrolluara dhe potencialisht të rrezikshme në treg”, thuhet në njoftimin për media.
Tutje thuhet se duke e njohur rëndësinë e llogaridhënies brenda profesionit farmaceutik, Dogana e Kosovës zotohet të informojë me kohë Odën e Farmacistëve për çdo parregullsi apo rast të kontrabandës që përfshin profesionistë të farmacisë.
Kjo qasje bashkëpunuese, sipas njoftimit, e fuqizon Odën e Farmacistëve për të ndërmarrë masa disiplinore, duke përfshirë gjobat ose revokimin e licencave, ndaj farmacistëve përgjegjës, duke zbatuar qasje gjithëpërfshirëse për të luftuar kontrabandën me barëra nga shumë kënde ligjore.
Po ashtu, Dogana e Kosovës i bën thirrje publikut që të tregojë kujdes gjatë blerjes së barnave, duke theksuar domosdoshmërinë e verifikimit të banderolave të lëshuara nga Ministria e Shëndetësisë për produktet farmaceutike.
“Për të lehtësuar përfshirjen e publikut në këtë përpjekje kolektive, Dogana e Kosovës inkurajon qytetarët që të raportojnë çdo rast kur hasin në barna kontrabandë. Dogana mirëmban linja të sigurta komunikimi dhe ofron aplikacionin e sigurt të raportimit eDogana për telefonat inteligjentë”, thuhet në njoftim.
Në njoftim thuhet se duke nxitur një komunitet bashkëpunues dhe vigjilent, Dogana e Kosovës dhe Oda e Farmacistëve të Kosovës janë të bashkuar në luftën kundër aktiviteteve të paligjshme që rrezikojnë shëndetin dhe sigurinë publike në njërën anë dhe padrejtësisht dëmtojnë tregtarët e përgjegjshëm.























