Spanja lë mbrapa Francën dhe kalon në finale
Uran Krasniqi/RTKLive
(E plotësuar, 22:55) Spanja ka arritur të triumfojë ndaj Francës në gjysmëfinalen e Euro 2024, duke siguruar kështu finalen e madhe.
Ndeshja e zhvilluar në "Allianz Arena" ka përfunduar me rezultatin 2-1 në favor të skuadrës së drejtuar nga Luis de la Fuente.
Franca ka kaluar në epërsi që në minutën e nëntë, kur Kolo Muani ka shënuar me kokë pas një asistimi nga Mbappe.
Megjithatë, Spanja ka reaguar shpejt dhe në minutën e njëzet e një, Yamal e ka barazuar rezultatin me një gjuajtje të fuqishme nga distanca, duke u bërë njëkohësisht futbollisti më i ri që ka shënuar në një Kampionat Evropian.
Vetëm katër minuta më vonë, Spanja ka kaluar në epërsi falë një autogoli të Kounde, i cili e ka devijuar një gjuajtje nga Olmo.
Pjesa e parë ka përfunduar me rezultatin 2-1 për Spanjën.
Në pjesën e dytë, Franca është përpjekur vazhdimisht ta barazojë rezultatin, me trajnerin Didier Deschamps që ka futur në lojë Camavinga, Griezmann, Barcola dhe Giroud. Megjithatë, përpjekjet e tyre nuk rezultuan të suksesshme.
Në minutën e tetëdhjetë e një, Spanja ishte pranë rritjes së epërsisë, por gjuajtja e Yamal ka shkuar mbi shtyllë. Vetëm katër minuta më vonë, Mbappe ka tentuar nga distanca, por goditja e tij nuk ishte e saktë.
Nesër do të zhvillohet gjysmëfinalja tjetër mes Anglisë dhe Holandës, për të përcaktuar se kush do të jetë kundërshtari i Spanjës në finalen e Euro 2024.

Spanja po fiton kundër Francës pas dyzet e pesë minutave
Spanja po fiton kundër Francës pas pjesës së parë të ndeshjes gjysmëfinale të Euro 2024
Rezultati në "Allianz Arena" është 2-1.
Edhe pse ka qenë Franca ajo që e ka gjetur e para epërsinë, Spanja brenda pak minutave ia ka dalë ta përmbysë rezultatin .
Franca ka kaluar në epërsi në minutën e nëntë, kur Kolo Muani ka shënuar me kokë.
Megjithatë, Spanja ka reaguar shpejt dhe në minutën e njëzet e një, Yamal e ka barazuar rezultatin me një gjuajtje të fortë nga distanca. Ky gol e ka bërë gjashtëmbëdhjetë vjeçarin futbollistin më të ri që ka shënuar në një Kampionat Evropian.
Vetëm katër minuta më vonë, Spanja ka kaluar në epërsi pas një autogoli të Kounde, i cili e ka devijuar një gjuajtje nga Olmo.
Ndeshja mbetet e hapur, me një pjesë të dytë të plotë në dispozicion të të dy ekipeve për të provuar ndryshimin e rezultatit.
Franca dhe Spanja, formacionet
Franca dhe Spanja ndeshen sonte në kuadër të gjysmëfinales së Euro 2024. Tashmë janë publikuar edhe formacionet zyrtare.























