Japonia dhe Suedia avancojnë në fazën nokaut pas barazimit në Dallas
B.H./RTKlive
Japonia dhe Suedia kanë siguruar kualifikimin në fazën nokaut të Kupës së Botës 2026, pasi barazuan 1:1 në ndeshjen e fundit të Grupit F, të zhvilluar në Dallas.
Ky rezultat i mjaftoi Japonisë për ta mbyllur grupin në vendin e dytë me pesë pikë, pas Holandës, ndërsa Suedia, me katër pikë, avancoi si njëra nga tetë kombëtaret më të mira të renditura në vendin e tretë.
Japonia dominoi pjesën e parë dhe krijoi disa raste të mira shënimi përmes Daizen Maeda, Yukinari Sugawara dhe Keito Nakamura, por portieri suedez Jakob Zetterström reagoi me sukses duke mbajtur të paprekur rrjetën.
Avantazhi për japonezët erdhi në minutën e 56-të, kur Daizen Maeda finalizoi një asistim të bukur nga Ritsu Doan. Megjithatë, Suedia reagoi shpejt dhe vetëm gjashtë minuta më vonë Anthony Elanga barazoi me një goditje të fuqishme nga distanca.
Në minutat e mbetura, Suedia ishte pranë golit të fitores, por portieri japonez Zion Suzuki bëri pritje vendimtare ndaj Alexander Isak dhe Elanga, duke ruajtur barazimin që i dërgoi të dyja skuadrat në fazën eliminuese.
Me këtë rezultat dhe fitoren e Holandës ndaj Tunizisë, Japonia do të përballet me Brazilin, fituesin e Grupit C, në 1/16 e finales. Ndërkohë, Suedia do të luajë ndaj fituesit të njërit prej grupeve B, E ose I.
Portieri i Japonisë, Zion Suzuki, u shpreh i kënaqur me kualifikimin. "Ishte një ndeshje e fortë. Kaluam në epërsi, por pas golit të barazimit kundërshtari mori iniciativën. Megjithatë, arritëm objektivin kryesor – të mos humbnim dhe të siguronim kualifikimin. Tani e presim me besim sfidën ndaj Brazilit", tha Suzuki.
Sulmuesi suedez Anthony Elanga shprehu keqardhje që skuadra e tij nuk fitoi, por vlerësoi paraqitjen e ekipit. "Doja shumë fitoren, por në fund edhe kjo pikë rezultoi e mjaftueshme. Jam krenar për ekipin dhe veçanërisht për portierin Jakob Zetterström, i cili zhvilloi një ndeshje të shkëlqyer", deklaroi Elanga.
Për Japoninë, ky është Botërori i parë në histori ku e përfundon fazën e grupeve pa pësuar humbje, duke konfirmuar formën e mirë para sfidës së madhe me Brazilin.























