Tre të vdekur nga zjarri në Kili, vazhdojnë trazirat
BKT
   Bota

Tre të vdekur nga zjarri në Kili, vazhdojnë trazirat

Tre persona kanë vdekur nga një zjarr në një dyqan në kryeqytetin e Kilit, Santiago. Ky zjarr u shkaktua gjatë natës së dytë të protestave të dhunshme që e kanë përfshirë vendin e largët të Amerikës Jugore.

Dy njerëz vdiqën në vendin e ngjarjes dhe një tjetër vdiq më vonë në spital. Lajmin e bëri të ditur kryetarja e kryeqytetit kilian, Karla Rubilar.

Presidenti i Kilit, Sebastian Pinera, e ka anuluar vendimin për rritjen e çmimit të transportit në metro, vendim i cili i kishte nxitur protestat. Megjithatë, përleshjet e dhunshme mes policisë dhe protestuesve vazhduan edhe të shtunën në mbrëmje.

Në rrugët e Santiagos janë vendosur ushtarë dhe tanke pasi qeveria e shpalli gjendjen emergjente dhe vendosi orë policore gjatë tërë natës.

Këto protesta e pasqyrojnë një pakënaqësi të gjerë ndaj kostos së lartë të jetesës në njërin nga vendet më të qëndrueshme të Amerikës Latine.

Ushtria u angazhua në hapësira publike për herë të parë që nga viti 1990, kur në këtë shtet ishte rrëzuar diktatura e politikanit dhe gjeneralit Augusto Pinochet dhe kishte filluar se zbatuari sistemi demokratik.

Në ditën e dytë të protestave, protestuesit i larguan barrikadat e vendosura nga policia dhe ua vunë flakën autobusëve, ndërsa policia u kundërpërgjigj me gaz lotsjellës dhe kamion me ujë.

Sipas të dhënave të policisë, më shumë se 300 persona janë arrestuar, ndërsa 156 policë e 11 civilë kanë pësuar lëndime gjatë përleshjeve, shkruan “BBC”.