Shqetësuese rritja e numrit të pacientëve me diabet në Kosovë
Vaide Morina , Radio Kosova
Sipas statistikave të Shoqatës Kombëtare të Diabetikëve në Kosovë, shënohen rreth 70 mijë pacientë të diagnostikuar me diabet. Kryetari i kësaj shoqate , Idriz Ethemi, tha për Radio Kosovën se rritja e numrit të pacientëve të prekur me diabet, është shqetësuese.
Sot në ditën botërore të diabetit, Shoqata Kombëtare e Diabetikëve në Kosovë, organizon aktivitete të shumta vetëdijesuese lidhur me rëndësinë e zbulimit të hershem të kësaj sëmundjeje.
Idriz Ethemi, kryetar i kësaj shoqate, thotë se është mjaft shqetësuese rritja e numrit të pacientëve me diabet në Kosovë.
Në Kosovë ekzistojnë insulinë marrës rreth 16 mijë pacientë. Ndërsa sipas statistikave, të prekur me diabet janë diku rreth 60-70 mijë qytetarë. Në shtatë (7) qendra të Kosovës organizohet matja e glikemisë nga Shoqata e të prekurve më diabet. Nëpër qendra të tjera siç është Prishtina, Gjakova edhe nëpër qytete të tjera të Kosovës organizohen edhe ligjërata prej stafit profesional endokrinolog.
Ethemi rekomandon institucionet e vendit që t’i kushtojnë më shumë rëndësi vetëdijesimit për këtë sëmundje e jo vetëm në ditën botërore por edhe gjatë tërë vitit.
Diabeti është bërë një epidemi për shkak të obezitetit apo mbipeshës. Mesazhi ynë është sa më shumë aktivitet fizik, kontroll të endokrinologë të cilët merren me problematiken e diabetit.
Motoja për këtë vit në ditën botërore të diabetit është “ Mbroje Familjen”.























