Trump firmos dekretin për antisemitizmin në kampuset universitare
Presidenti amerikan Donald Trump nënshkroi sot një dekret të diskutueshëm për të luftuar antisemitizmin në kampuset universitare, subjekt i polemikave intensive, që kritikët e tij e kanë cilësuar si sulm ndaj lirisë së shprehjes.
Ky dekret zgjeron përkufizimin e antisemitizmit, që përdoret nga Ministria e Arsimit, kur zbaton Ligjin për të Drejtat Civile të vitit 1964. Në mënyrë të veçantë, në të urdhërohet përdorimi i përkufizimit të antisemitizmit, i dhënë nga Aleanca Ndërkombëtare për Kujtimin e Holokaustit (IHRA).
”Me këtë dekret, Donald Trump mbron studentët hebrenj dhe bën të qartë se antisemitizmi nuk do të tolerohet”, tha dhëndri dhe këshilltari i tij, Jared Kushner në një artikull në ”New York Times”.
Por, mbrojtësit e lirisë së shprehjes kanë frikë se përkufizimet shumë të gjera dhe të paqarta të antisemitizmit do të përdoren për të ndaluar të gjitha kritikat ndaj politikës së qeverisë izraelite./atsh/























