Britania në "fazën e emergjencës" pasi një doktor vdes nga COVID-19

Britania në "fazën e emergjencës" pasi një doktor vdes nga COVID-19

Amged El-Hawrani është mjeku i parë që vdiq në vend pasi rezultoi pozitiv me koronavirus.

Britania e Madhe "tani është në një situatë emergjente", pasi mjeku që rezultoi pozitiv me koronavirus vdiq, e cila shënon vdekjen e parë të këtij lloji në vend, tha një zyrtar qeveritar, raporton Anadolu Agency.

Duke nënvizuar se vënia e vendit në një situatë emergjente ishte "një hap i paparë në kohë paqeje", Robert Kenrick, sekretari i shtetit për strehimin, komunitetet dhe qeverisjen lokale, tha: "Ne po krijojmë qendra të koordinimit strategjik në të gjithë vendin". 

"Çdo qendër drejtohet nga komandantë të lartë. Jemi duke mbledhur anëtarët e moshuar të shërbimeve të urgjencës, policisë, shërbimit zjarrfikës, shërbimit të ambulancës, së bashku me autoritetet lokale dhe Shërbimin Kombëtar Shëndetësor për të udhëhequr komunitetin gjatë kësaj periudhe sfiduese", shtoi Kenrick. 

Autoritetet shëndetësore thanë të dielën se numri i vdekjeve në vend nga koronavirus arriti në 1.235, një rritje me 207 vdekje në 24 orët e fundit.

Jenrick u adresua së bashku me Dr Jenny Harris, zv/shefin kryesor të mjekësisë për Anglinë.

"Kryeministri tha që ai do të rishikojë (bllokimin) në tre javë. Do të ishte marrëzi nga ne që të fillonim diçka një ditë dhe të supozojmë se do të ketë ndikim ditën tjetër", tha Harris.

"Këto masa janë zbatuar plotësisht për një javë ose dy. Ne kemi nevojë për disa javë që të shohim këtë", shtoi ajo.

Harris tha se vendi mund të duhet të presë për gjashtë muaj, ose ndoshta më shumë, përpara se të kthehet në normalitet.

Mjeku i parë britanik vdes nga COVID-19

Shërbimi Kombëtar Shëndetësor i Anglisë njoftoi të dielën se Amged El-Hawrani ishte punëtori i parë i kujdesit shëndetësor në vijën e parë që vdiq pasi rezultoi pozitiv me koronavirus.

Ai ishte një mjek konsulent i veshit, hundës dhe fytit (ENT) dhe vdiq në Spitalin Mbretëror të Leicesterit të shtunën në mbrëmje. 

Profesori Stephen Powis, drejtori mjekësor i Shërbimit Kombëtar të Shëndetësisë, tha: "U shprehi ngushëllimet e mia të thella familjes Amged në këtë kohë jashtëzakonisht të trishtuar. Shërbimi Kombëtar i Shëndetësisë është një familje dhe të gjithë ne ndiejmë thellësisht humbjen e cilitdo prej kolegëve tanë, pasi të gjithë ne vazhdojmë të bashkohemi dhe të punojmë së bashku për të trajtuar përhapjen e koronavirusit".

Zëdhënësi i familjes El-Hawrani tha: "Amged arriti pjesën më të lartë të profesionit të tij dhe ne e dimë që ai bëri një ndryshim në mijëra jetë gjatë karrierës së tij. Ai e shikoi rolin e tij si mjek si një nga profesionet më fisnike të jetës. Ai ishte gjithashtu një drejtues, i cili edukoi shumë mjekë që më pas janë bërë konsulentë të ENT-së. Ne jemi tepër krenarë për trashëgiminë që ai ka lënë pas dhe gjithçka që ka arritur".

"Të humbasësh Amged është pikëlluese për familjen tonë. Jeta pa të është e pamundur të imagjinohet, por së bashku, ne do të bëjmë gjithçka mundemi për të përkujtuar atë dhe të jetojmë ashtu si do të kishte dashur ai", tha zëdhënësi.

Të dhënat e përpiluara nga Universiteti Johns Hopkins me qendër në SHBA tregojnë se numri i të prekurve me koronavirus në të gjithë botën ka shkuar në mbi 700.000 me mbi 34.000 vdekje. Më shumë se 145.700 janë shëruar nga infeksioni.

Pasi u shfaq për herë të parë në Wuhan të Kinës dhjetorin e kaluar, virusi është përhapur në 177 vende dhe rajone.