Rusia konfirmon 440 raste të reja me koronavirus
BKT
   Bota

Rusia konfirmon 440 raste të reja me koronavirus

Autoritetet lokale po testojnë një aplikacion të veçantë të krijuar për të monitoruar lëvizjet e rasteve pozitive që vullnetarisht zgjedhin trajtimin në shtëpi.

Rusia ka konfirmuar sot 440 raste të reja me koronavirus në 24 orët e fundit, duke e çuar numrin e përgjithshëm në 2.777, transmeton Anadolu Agency.

Autoritetet shëndetësore në Rusi thanë se vendi ka raportuar gjithsej 24 vdekje të lidhura me COVID-19 deri më tani, me 7 raste të reja në 24 orët e fundit.

"Deri më tani, 2.777 raste të infektimit me koronavirus janë regjistruar në 75 rajonet e Federatës Ruse. Gjatë ditës, 69 persona janë lëshuar në shtëpi, ndërsa 190 persona janë shëruar gjatë gjithë periudhës. Gjatë ditës janë regjistruar 7 raste fatale", thuhet në kumtesë.

Koronavirusi po përhapet veçanërisht shpejt në kryeqytetin Moskë, ku janë regjistruar dy të tretat e rasteve të përgjithshme, respektivisht 1.880 raste.

Autoritetet lokale po testojnë një aplikacion të veçantë të krijuar për të monitoruar lëvizjet e rasteve pozitive që vullnetarisht zgjedhin trajtimin në shtëpi.

"Aplikacioni celular i Monitorimit Social po zhvillohet dhe testohet brenda vendit", u tha përaqësuesve të mediave, Denis Lysenko, një përfaqësues i administratës së Moskës, duke shtuar se programi do të jetë i nevojshëm për të monitoruar nëse pacientët që ndodhen në trajtim shtëpiak zbatojnë regjimin e karantinës.

"Kjo do të garantojë sigurinë e të tjerëve dhe do të parandalojë përhapjen e mëtejme të koronavirusit", tha Lysenko.

Për të frenuar përhapjen e infeksionit, Rusia vendosi bllokime në disa rajone, përfshirë Moskën dhe qytetin e dytë më të madh Shën Petersburg, ndërsa numri i rajoneve nën bllokim shtohet çdo ditë.

Banorët në zonat e mbyllura lejohen të largohen nga shtëpitë vetëm për blerjen e produkteve ushqimore, për të shëtitur kafshët shtëpiake dhe për të hedhur mbeturinat.

Gjithashtu, Rusia ka ndaluar hyrjen e shtetasve të huaj dhe ka suspenduar trafikun ajror ndërkombëtar.