Zjarr në një spital në Shën Petersburg të Rusisë, vdesin pesë pacientë
BKT
   Bota

Zjarr në një spital në Shën Petersburg të Rusisë, vdesin pesë pacientë

Pesë pacientë me koronavirus kanë vdekur nga zjarri që shpërtheu në repartin e kujdesit intenzit të një spitali në Shën Petersburg të Rusisë.

Agjencitë ruse të lajmeve raportuan se zjarri qartazi është shkaktuar nga një lidhje e shkurtë në një ventilator, shkruan “BBC”.

Zjarri tashmë është vënë nën kontroll dhe 150 persona janë evakuuar nga spitali, tha Ministria e Emergjencave. Nuk është ende e qartë se sa persona janë lënduar.

Ndryshe, Rusia e ka zënë vendin e katërt në botë sa i përket numrit të të infektuarve, duke e larguar nga kjo pozitë Italinë.

Megjithatë, presidenti rus, Vladimir Putin, të hënën njoftoi se vendi i tij do t’i lehtësojë masat kufizuese, pavarësisht shifrës rekorde ditore të rasteve të reja – 11,656.

Kështu, në punë do të rikthehen punëtorët e ndërtimtarisë, fermave dhe fabrikave. Në Moskë, përdorimi i maskave është i obligueshëm në transportin publik dhe në dyqane.