Samiti virtual për vaksinat mbledh 8,8 miliardë dollarë
BKT
   Bota

Samiti virtual për vaksinat mbledh 8,8 miliardë dollarë

Gjatë samitit virtual, që mblodhi më shumë se 50 vende dhe mbi 35 krerë shtetesh për çështjen e një vaksine kundër COVID-19, objektivi u arrit dhe u tejkalua.

Samiti global i promovuar nga Britania e Madhe dhe i destinuar për të mbledhur fonde për Aleancën e Vaksinave (GAVI), arriti të mbledhë rreth  8,8 miliardë dollarë nga 7,4 të planifikuara për vaksinat në botë.

“Nga kjo shumë dy miliardë dollarë do të jepen për kërkime dhe prodhimin e një vaksine kundër koronavirusit”, theksoi kryeministri britanik Boris Johnson në përfundim të takimit.

“Shpresoj që ky samit do të jetë momenti ku bota do të bashkohet për unifikimin e njerëzimit në luftën kundër sëmundjes”, deklaroi kryeministri britanik në fjalimin e tij.

“Ju bëj thirrje të na bashkoheni, për të fortifikuar këtë aleancë që shpëton jetë dhe inauguron një epokë të re të bashkëpunimit botëror në shëndetësi”, shtoi Boris Johnson, vendi i të cilit ka qenë një ndër më të prekurit nga koronavirusi me rreth 40 000 të vdekur.

Britania e Madhe është për momentin kontribuesja më e madhe në GAVI me 1,65 miliardë sterlina (1,85 miliardë euro), të premtuara për pesë vitet e ardhshme./atsh/