Zjarre pyjore në SHBA, dhjetëra të vdekur
BKT
   Bota

Zjarre pyjore në SHBA, dhjetëra të vdekur

Zjarret në pyje kanë goditur më shumë shtetin federal të Kalifornisë. Meteorologët njoftojnë se moti i ngrohtë dhe i thatë mund të ndikojë në përhapjen e zjarrit në ditët në vijim.

Së paku 34 persona e kanë humbur jetën ndërsa disa të tjerë janë zhdukur në zjarret që për disa javë janë aktive në bregun perëndimor të SHBA-ve, transmeton Anadolu Agency (AA).

Zjarret në pyje kanë goditur më shumë shtetin federal të Kalifornisë. Meteorologët njoftojnë se moti i ngrohtë dhe i thatë mund të ndikojë në përhapjen e zjarrit në ditët në vijim.

Guvernatori i Kalifornisë, Gavin Newsom tha se të paktën 25 persona e kanë humbur jetën në këtë shtet gjatë katër javëve të fundit si rezultat i zjarreve.

Ai theksoi se zjarret aktuale janë një tregues i qartë i pasojave shkatërruese të ndryshimeve klimatike.

"Temperaturat mesatare ditore të ajrit janë rritur me 3 gradë në katër dekadat e fundit. Temperaturat më të larta të ajrit në historinë e Kalifornisë u matën vetëm gushtin e kaluar. Zjarrfikësit po bëjnë një betejë të madhe me zjarret, por lufta e vërtetë që ne po bëjmë është ajo kundër ndryshimeve klimatike", tha Newsom.

Ai tha se për shkak të thatësirës, ​​136 milionë pemë u thanë dhe se 19.000 kilometra katrorë pyje u shkatërruan nga zjarret.

Shteti i Oregonit po ashtu është prekur nga 29 zjarre të ndara në pyje, në të cilat 8 persona humbën jetën ndërsa 16 të tjerë llogariten si të zhdukur.

Gjithashtu edhe Washingtonin e kapluan zjarre të ngjashme në të cilat janë djegur 2.500 kilometra katrorë pyje ndërsa mbi këtë rajon është ngritur re e dendur tymi.

Gjatë zjarreve në Washington ka humbur jetën një person dhe janë djegur 200 objekte ndërsa është shkatërruar 132 kilometra rrjet elektrik.

Presidenti i SHBA-ve, Donald Trump shpalli gjendje të jashtëzakonshme në Kaliforni.