Koreja Veriore planifikon paradën më të madhe ushtarake
Janë shtuar spekulimet se Koreja Veriore do t’i prezantojë armët më të reja në një paradë të madhe këtë fundjavë për ta shënuar 75-vjetorin e themelimit të Partisë së Punës, e cila e ka pushtetin absolut në shtetin komunist.
Kjo paradë, e cila përcillet me interesim të madh për shkak të dyshimeve për zhvillimin e armëve të reja, pritet të jetë organizimi më i madh i këtij lloji në historinë e Koresë Veriore, shkruan The Guardian, transmeton Gazeta Express.
Sipas një faqeje që i përcjell zhvillimet në Korenë Veriore, e quajtur “38 North”, pamjet satelitore tregojnë që në këtë paradë do të marrin pjesë mijëra ushtarë, të cilët do të përcillen nga lideri i tyre suprem, Kim Jong-un.
Pas trupave do të kalojnë tanket dhe automjetet tjera të blinduara, por interesimi më i madh do të jetë për raketat me rreze të gjatë veprimi, të cilat mund të arrijnë deri në territorin e Shteteve të Bashkuara.
Bisedimet rreth armëve bërthamore mes liderit të Koresë Veriore dhe presidentit amerikan, Donald Trump, kanë ngecur që nga samiti i vitit të kaluar, i cili kishte përfunduar pa marrëveshje.
Gjatë fjalimit për Vitin e Ri, Kim Jong-un kishte thënë se do ta prezantojë një armë të re strategjike. Analistët besojnë se mund të bëhet fjalë për raketën e tipit ICBM, e cila mund të bartë disa koka bërthamore.























