Nigeri, një grup i armatosur hyn në xhami dhe rrëmben 17 persona
Sipas mediave lokale, sulmuesit e paidentifikuar hynë në një xhami në qytetin Gwargwada-Sabo gjatë lutjes.
Një grup i armatosur i cili hyri në një xhami në shtetin federal Nasarawa të Nigerisë rrëmbeu 17 persona, transmeton Anadolu Agency (AA).
Sipas mediave lokale, sulmuesit e paidentifikuar hynë në një xhami në qytetin Gwargwada-Sabo gjatë lutjes.
Me atë rast, ata rrëmbyen 17 persona, përfshirë tre gra, ndërsa më pas kërkuan shpërblim prej 1 milion naira (rreth 2.260 euro) nga anëtarët e familjes.
Qeveria nigeriane nuk është prononcuar lidhur me këtë rast.
Në disa shtete federale të Nigerisë, përdorimi i motoçikletave është ndaluar për shkak të sulmeve të fundit të kryera duke përdorur pikërisht mjete të tilla.
Në veriperëndim të Nigerisë për shkak të kullotave shpesh vjen deri tek përleshjet midis banorëve vendas dhe barinjve që vijnë nga pjesë të tjera të vendit, veçanërisht midis barinjve nga komuniteti Fulani dhe fiseve që jetojnë nga bujqësia.
Pjesëtarët e komunitetit Fulani pretendojnë se fermerët po përpiqen të vjedhin bagëtinë e tyre dhe shpesh i sulmojnë ata.
Për shkak të këtyre përleshjeve në këtë zonë kanë humbur jetën rreth 2.000 persona ndërsa mijëra të tjerë kanë braktisur shtëpitë e tyre.























