Rusia shënon rekord të viktimave dhe rasteve ditore me koronavirus
BKT
   Bota

Rusia shënon rekord të viktimave dhe rasteve ditore me koronavirus

Gjatë 24 orëve të kaluara, në Rusi janë regjistruar 24.822 raste të reja të koronavirusit, që është shifra më e madhe prej fillimit të pandemisë.

Vetëm në kryeqytetin rus, Moskë, gjatë kësaj periudhe u regjistruan 7.168 raste, shifër që po rritet vazhdimisht ditëve të fundit.

Pas rasteve të reja, numri i përgjithshëm i personave të infektuar me SARS-CoV-2 në Rusi shkoi në mbi 2 milionë e 64 mijë, shkruan The Guardian.

Rusia është shteti i pestë në botë me më së shumti të infektuar, pas Shteteve të Bashkuara, Indisë, Brazilit dhe Francës.

Përpos infektimeve, në 24 orët e kaluara u regjistruan edhe 467 persona të vdekur nga koronavirusi, që gjithashtu është shifër rekorde. Kështu, numri i përgjithshëm i viktimave të pandemisë në Rusi shkoi në 35.778.

Ndryshe, Rusia ka deklaruar se ka zbuluar dy vaksina kundër sëmundjes COVID-19, por vendet perëndimore kanë dyshime për efikasitetin e tyre shkaku i mungesës së transparencës gjatë testimit.