Dy mutacione të reja të zbuluara në Angli
Dy variante të reja të koronavirusit janë identifikuar në Angli.
Ata kanë disa ngjashmëri me mutacionet që janë zbuluar në Afrikën e Jugut dhe Brazil.
Një nga variantet e reja klasifikohet si shqetësuese, njofton komiteti i virusit i qeverisë britanike.
Deri më tani 76 raste të sëmundjes me variantet e reja janë regjistruar në Angli, njofton Hbl, transmeton RTKLive.
Mutacioni shqetësues i virusit u identifikua për herë të parë në Bristol, ndërsa tjetri është zbuluar në Liverpool që ende po hetohet.
Të dy variantet e reja kanë të njëjtin mutacion në të ashtuquajturën “spike proteinë” që është vërejtur në variantet e virusit të Afrikës së Jugut dhe të Brazilit, dhe që ka shkaktuar shqetësim në nivel ndërkombëtar.
“Proteina spike” është ajo që virusi përdor për të hyrë në qelizat e trupit. Pavarësisht nga mutacioni, autoritetet britanike thonë se janë të sigurt se vaksina do t’i paralizojë variantet e reja të virusit./RTKLive























